Доктор Владимир Чадиковски денеска и официјално го доставил отказот и спогодбено го раскинал договорот со приватната болница на Жан Митрев. Во исто време уште двајца анестезиолози од тимот на Чадиковски си заминуваат од болницата, а по нив најверојатно ќе следи заминување и на другите членови на тимот кои од Клиниката за детска хирургија, преку прокетот за јавно приватно партнерство преминаа во болницата на Жан Митрев.
Останува нејасно како ќе тече проектот понатаму, кој ќе ги оперира бебињата до една година ставајќи го својот потпис на тие операции на срце, кога таму веќе детски кардиохирург веќе нема, а Чадиковски е единствениот лиценциран во државата.
Во Лекарската комора потврдуваат дека само Чадиковски има лиценца за детска кардиохирургија.
„Лекарската комора има издадено 3 типа на лиценци: Едната лиценца е кардиоторакална хирургија како што ја има доктор Салис Таџер, 5 се од областа на кардиохирургија, 11 за кардиоваскуларна хирургија меѓу кои е и лиценцата на доктор Жан Митрев и една лиценца е за детска кардиохирургија со која се здобил доктор Владимир Чадиковски“, изјави за НОВА, доктор Калина Гривчева Старделова, претседателка на Лекарската комора на РСМ.
Од тие причини несајно е како Министертвото за здравство планира да го продолжи проектот и најави дека операции кај деца таму ќе се изведуваат непречено и без Чадиковски. НОВА не доби одговор на прашањето за каква дејност е регистрирана кардиохиргија на Жан Митрев, односно каква е дозволата за дејност, дали е за детска кардиохирургија. Наместо тоа повторно го добивме истиот одговор од вчера дека „Клиничката болница „Жан Митрев“ и Фондот за здравствено осигурување имаат склучено годишен договор за операција на деца до една година“, што е нешто сосема друго. Општо е познато дека дозволата за дејност не ја издава ФЗОМ, туку Министерството за здравство.
Надлежните не откриваат колку ја чини државата овој проект на јавно приватно партнерство, кој очигледно сега останува да биде само приватно. Кој е бенефитот на државата од овој проект? Колку пари се заштедени досега и зошто се зголемени цените на услугите за операции кај деца од кога започна овој проект.
Во една прилика, пред да избие скандалот со детската кардиохирургија директорот на ФЗОМ, за НОВА објаснуваше дека не е зголемена цената на услугата туку ДРГ цената на процедурата со вметнување на дополнителни 25 проценти додаток (услуга за операции) за деца и 10 проценти за терцијална услуга.
„По програмата не праќаме веќе деца во странство, со исклучок само на едно до сега, а условите се подобри тука. Заштедата е во тоа што не плаќаме повеќе за лекари од странство, туку тоа го плаќа болницата на Митрев од вкупниот буџет кој го добива од ФЗОМ“ рече Ден Дончев за НОВА, пред неполн месец но, овој дел од разговорот не е објавен досега.
И секако надлежните треба да одговорат дали државата после сето ова ќе застане зад доктор Чадиковски бидејќи тој заедно со тимот замина во болницата на Жан Митре по предлог на министерот Филипче и на директорот на ФЗОМ, Ден Дончев.
Како што веќе објави НОВА не постоел ниту договор за јавно приватно партнерство меѓу Министерството за здравство и специјалната болница за кардиохирургија „Филип Втори“ иако здравствените власти проектот спектакуларно на прес-конференција го најавија во Влада во декември минатата година, а всушност целиот проект се одвивал без официјален документ.