Хрватот не очекувал дотолку луд меч против Ла Риоха. Како пресудни за триумфот ги издвои срцето, упорноста, борбеноста и желбата на неговите ракометари, поддршката од гледачите и голманот Дарко Арсиќ
Лино Червар во свој стил по победата на Металург против Ла Риоха во Лигата на шампиони. Хрватскиот тренер ги зема во предвид сите аспекти за натпреварот по кој неговите ракометари се радуваа со 24:23. Од неможноста да смета на Марчец и Младеновиќ поради повреди, до „големото срце што се остави на терен“, упорноста и борбеноста на играчите, поддршката од навивачите, голманот Арсиќ.
„Луд натпревар. Што да кажам. Оние што ги гледаат нашите настапи ќе мора да земаат таблети за смирување да издржат до крај“, коментира Червар.
Сите честитки за новата радост одат во правец на Дарко Арсиќ, човекот меѓу стативите на Металург кој со своите одбрани ги фрустрира ракометарите на Ла Риоха. Не дозволи да биде совладан во 16 противнички закани кон него, ги „спушти ролетните“ и пред Фернандез во контранападот во, буквално, последните моменти од средбата.
„Арсиќ имаше огромен придонес против Ла Риоха. Му благодарам. Ја форсиравме надворешната линија од каде дадовме и најголем број од головите. Задоволен сум бидејќи успеавме да ги намалиме и техничките грешки. Во Загреб го имавме 19, против Ла Риоха 13. И тоа е постепен напредок, дека ќе одигравме толку луд меч не очекував“, додаде Хрватот на клупата на Металург.