Камил Штох е победник на годинашното издание на турнејата „Четири скокалници“. Полјакот беше најдобар во последниот натпревар во австриски Бишофсхофен и со скокови од 139,5 метри и 138 метри го симна Танде од лидерската позиција во генералниот пласман. Втор беше домашниот натпреварувач Михаел Хајбок, третото место го освои сонародник на Штох, Пјотр Зила.
Штох беше втор во Оберсдорф и во Гармиш Партенкирхен и четврти во Инсбрук, а денешната победа, сепак, беше доволна да биде прв полски освојувач на новогодишната турнеја по Адам Малиш во 2001 година.
Даниел Андре Танде, лидер на „Четирите скокалници“ по трите претходни станици, во Бишофсхофен беше трагичар. Третопласираниот по првата серија на крајот заврши како 26-ти поради катастрофалниот доскок на 117 метар во втората серија. Норвежанецот победи во Гармиш и во Инсбрук и беше четврт во Оберсдорф.
Словенечките браќа Домен и Петер Превц се пласираа на четвртото, односно, 23 место. Светскиот куп во скијачки скокови продолжува на 14 јануари во Висла, Полска.