Иако бројот на македонски баратели на азил во Германија е намален, воведувањето на визен режим повторно е на маса, особено по писмото до Даблин на министрите на Германија, Австрија, Холандија и Велика Британија, јавува Дојче Веле на македонски.
Писмото кое е потпишано од министерот Фридрих и неговите ресорни колеги од Австрија, Холандија и Велика Британија, до Даблин било испратено на 25 април, само шест дена по неформалната дискусија за оваа тема во Бундестагот.
Од Ирска, потписниците на писмото конкретно бараат прашањето околу можното суспендирање на слободниот визен режим да биде ставено на дневен ред на состанокот на комитетот за правда и внатрешни работи закажан за средината на јуни.
Според најновата статистика, од почетокот на 2013 заклучно со април, азил во Германија побарале 717 македонски државјани, со што земјата се наоѓа на десетто место, последна во групата која ја предводи Руската Федерација. На второ место се барателите азил од Сирија, по што следуваат Авганистан, Србија, Иран, Ирак, Пакистан, Сомалија и Грузија.