Четврти ден низ улиците на центарот од Скопје граѓаните во масовен број протестираа против полициската бруталност и бараат одговорност за смртта на младиот Мартин Нешкоски кој беше претепан до смрт за време на прославата на ВМРО-ДПМНЕ во 2011 од страна на полициски службеник.
Граѓаните соочени со полициски барикади денеска протесот го движеа на четири различни локации низ Скопје. Почнувајќи од булеварот „Климент Охридски“, во непосредна близина до Владата, демонстрантите наидоа на првиот полициски кордон кој не дозволи тие да се приближат до објектот.
-Владата која целосно го изгуби својот легитимитет се плаши од сопствениот народ, затоа не сакаат да не пуштат да протестираме пред Владата, кршејќи го Уставот на оваа земја. Никој не смее да бдие над Уставот на оваа земја, никој, ниту Никоал Груевски. Сега мирно ќе тргнеме, но ќе се вратиме назад и едно имаме да им порачаме – Ќе победиме!, порача активистот Здравко Савевски од Левичарското движење „Солидарност“.
Оттаму, колоната од демонстранти продолжи да маршира кон министерството за внатрешни работи. Поминувајќи покрај средношколскиот камп тие демонстарнтите ги поздравија средношколците кои втора недела спијат под отворено небо во паркот наспроти МОН и ги охрабрија да продолжат во својата битка.
Протестот за полициска бруталност наиде на кордот од специјалци и на улицата која води, кон зградата на МВР, а подоцна исто и пред зградата на премиерот Никоал Груевски.
Граѓаните револтирани скандираа „Пуштете не, сакаме да пријавиме убиство“ и „Николче-дикаторче“.
Четврта локација на која протестот и мирно заврши беше Собранието на Република Македонија. Таму до 21 часот вечерта граѓаните со свирежи и скандирања бараа одговорносот од Јанкулоска и Груевски, за обидот да се прикрие убиството на Мартин Нешкоски, нешто кое се обелодени по бомбата на опозицијата поврзана со смртта на младото момче.
Демонстрантите порачаа дека нема да се откажат, бидејќи ако замолчат, значи дека се соучесници во прикривањето на убиството.
На протестот беа присутни студенти, средношколци, активисти, родители со деца, пензионери и заврши без никаков инцидент.
Ова е четврти ден како се протестира против полициска бруталност, а трет ден откако полицијата не дозволува да се протестира пред Влада.