Четвртото издание на фестивалот на креативен документарен филм „МакеДокс“, годинава ќе се одржи од 15. до 21 јуни во Старата скопска чаршија. Публиката ќе има можност да погледне вкупно 27 остварувања од светската документарна продукција
Овогодинешните документарни теми ќе бидат поделени во четири програмски целини: главна програма, нови автори, балкански документарци, краткометражни документарни филмови. Локациски и оваа година фестивалот ќе се оддржи во Куршумли Ан, каде ќе бидат организирани повеќето случувања, а новитет за оваа година се репризите на филмовите кои ќе се оддржат во Младински Културен Центар (МКЦ).
Поделени во четири натпреварувачки категории, документарните филмови ќе бидат оценети и наградени од различни жириа. Официјални награди на МакеДокс се:
– Кромид- за најдобар филм во меѓународната натпреварувачка програма
– Млад кромид- за најдобар филм на нов автор (прв или втор филм)
– Кокарче- за најдобар филм за деца и млади
– Награда за филм за најдобри Етички идеи
И оваа година составен дел од фестивалот се работилниците, дискусиите под смоква, мастер клас, вечерните DJ сетови, изложбите. За време на фестивалските денови ќе бидат присутни околу 40тина истакнати режисери, продуценти, луѓе од меѓународната документарната филмска индустрија кои ќе ги претстават своите филмови и ќе ги споделат искуствата од својата работа.
„Значајно е да се споменат и нашите целогодишни активности наменети да го поддржат образовниот систем во Македонија. Имено, како дел од проектот „МакеДокс во училница“, кој е поддржан од страна на Националната дотација за демократија (National Endowment for Democracy) од Вашингтон и „Пипл ин нид“ (People in Need) од Прага, во март го издадовме нашиот образовен првенец: Прирачник за користење на документарни филмови во наставата, наменет за наставници по граѓанско образование и социологија во средните училишта во Република Македонија. Деветнаесет наставници од осум градови во Македонија беа обучени и користеа документарни филмови како дел од пилот-фазата на овој проект“, велат организаторите на фестивалот.
Фестивалот и оваа година ќе го продолжи своето патување низ Македонија.
„Со нашето Патувачко кино повторно ќе се обидеме да ги децентрализираме културните случувања и да им донесеме одредена културна доза и на останатите места“, велат од Македокс.