НОВA вчера го пренесе истражувањето на словенечкиот портал “Нецензурирано” во кое се тврди дека луѓе блиски на премиерот Виктор Орбан од 2017 година до сега префлиле 2,5 милиони евра во медиумите блиски до ВМРО ДПМНЕ а со цел да се опструира Преспанскиот договор а индиректно преку тоа и интеграцијата на Македонија во НАТО. Автор на ова истражување е новинарот Примож Чирман. Редакцијата на НОВА стапи во контакт со словенечкиот колега и од него побаравме одговори на неколку прашања.
НОВА: Кои се сознанија за таканаречената „Операција Македонија“?
Примож Чирман: Доказите сугерираат дека унгарските пари континуирано се префрлаат на разни медиумски организации во Македонија од 2017 година наваму. Парите беа префрлени преку Словенија, поголем дел од нив заврши во Македонија. Извор на парите се компаниите и луѓето кои се многу блиски до Виктор Орбан. Компанијата В4НА која се пренесува во Македонија преку Словенија е основана од унгарскиот амбасадор во Велика Британија и најблискиот советник на Орбан, Арпад Хабони. Тоа значи дека кругот на унгарскиот премиер ги финансира медиумите кои ја поддржуваат политичката партија која сака да го поништи договорот од Преспа, а со тоа и влезот на Македонија во Нато.
НОВА: На која основа се прави трансфер на паритеод Словенија во Македонија?
Примож Чирман: Дел од парите минале преку словенечката банкарска компанија на словенечката компанија Р-Пост-р, основана и управувана од Питер Шатц, сопственик на Алфа ТВ Скопје. Сè уште не можеме да потврдиме која е основата за други трансфери на пари во Македонија.
НОВА: Кои се инвеститорите?
Примож Чирман: Питер Шац и Агнес Адамик се поранешни вработени во унгарската национална телевизија. Денес тие се официјално претприемачи кои купуваат медиуми во Словенија, Хрватска и Македонија. Сепак, тие работат во интерес на унгарската влада.
НОВА: Како го објаснувате овој триаголник Будимпешта-Љубљана-Скопје?
Примож Чирман:Јас го гледам тоа како политички и – уште поважно – финансиски сојуз помеѓу Виктор Орбан, Јанез Јанша и ВМРО-ДПМНЕ.
НОВА: Зошто двајцата политички лидери од земји членки на НАТО и ЕУ би сакале да го блокираат пристапот на Македонија во НАТО ?
Примож Чирман: Добро прашање. Официјално Виктор Орбан и Јанез Јанша го поддржуваат членството на Македонија во ЕУ и во НАТО. Како и да е, протокот на унгарски пари покажува дека Орбан направил сè што може за да го саботира договорот од Преспа и со тоа членството на Македонија во НАТО. Мора да се спомене дека Виктор Орбан во моментов е во многу лоша врска со европската народна партија (ЕПП), најголемата европска политичка група. Тој во моментов е со жолт картон и може да биде исфрлен од ЕПП во наредните месеци. Затоа, тој интензивно бара алтернативи за алијанси во странство во време кога Јанез Јанша се обидува да формира влада во Словенија. Назад на вашето прашање: знаеме кои земји сакаат да го блокираат влезот на Македонија во европските интеграции и можеби и унгарската финансиска шема во Македонија има врска.