Синоќа во Атина Сириза го одржа последниот митинг пред утрешните избори, на кои се очекува грчката левица да победи за прв пат во историјата на грчката држава. Последните анкети покажуваат дека Сириза ја зголемува предноста пред Нова демократија.
Алексис Ципрас, шеф на парламентарната група СИРИЗА за Фајненшл Тајмс вели дека по утрешите избори, Грција ќе се смени.
-Мојата партија, Сириза, гарантира нов општествен договор за политичка стабилност и економска сигурност. Ние нудиме политики кои ќе стават крај на штедењето, ќе ја зајакнат демократијата и општествената кохезија и повторно ќе ја воспостават средната класа. Ова е единствениот начин за да се зајакне еврозоната и да се направи европскиот проект привлечен за граѓаните ширум континентот, се вели во текстот на Ципрас.
-Мора да завршиме со штедењето за да не дозволиме стравот да ја убие демократијата. Доколку силите на напредокот и демократијата не ја променат Европа, тоа промена ќе ја донесат Марин ле Пен и нејзините екстремно десни сојузници. Имаме должност да преговараме отворено, чесно, како еднакви со нашите европски партнери. Нема смисла доколку секоја страна започне да го покажува своето оружје и моќ.
Би сакал да разјаснам едно погрешно толкување: балансирањето на владиниот буџет не значи автоматско воведување на мерки за штедење. Владата предводена од Сириза ќе ја почитува обврската на Грција, како дел од еврозпоната да одржува балансиран буџет, и ќе се посвети на остварување на квантитативни цели. Сепак, основите на демократијата овозможуваат секоја новоизбрана влада да одлучи на кој начин ќе ги оствари тие цели.
Штедењето не е дел од европските договори; но нивен составен дел се демократијата и принципот на популарен суверенитет. Доколку жителите на Грција ја изразат нивната доверба во нас со нивните гласови, спроведувањето на нашата економска програма нема да биде “едностран” чин, туку демократска обврска.
Дали постои логична причина да се продолжи со пропишаната терапија доколку додатно ја влошува здравствената состојба? Мерките за штедење се неуспешни во Грција. Ја оштетија економијата и оставија без работа голем дел од работоспособното население.
Тоа е хуманитарна криза. Владата им вети на кредиторите на државата дека додатно ќе ги намали платите и пензиите, и ќе ги зголеми даноците во 2015 година. Но, овие обврски само додатно ја условуваат владата на Антонис Самарас – која, поради таа причина, нема да добие уште еден мандат на 25 јануари.
Ние сакаме да ја доведеме Грција на ниво на исправна, демократска европска држава.
Нашиот манифест, познат како Солунската програма, содржи збир на фискално балансирани краткорочни мерки за ублажување на хуманитарната криза, рестартирање на економијата и враќање на луѓето на работа.
За разлика од претходните влади, ние ќе се справиме со внатрешните фактори кои ја поттикнаа кризата. Ќе им се спротивставиме на сите економски олигарси кои избегнуваат плаќање на даноци. Ќе обезбедиме социјална правда и одржлив раст, во контекст на општествена пазарна економија.
Јавниот долг порасна до застрашувачки 177 проценти од бруто домашниот производ. Тоа е неодржливо; вршењето на исплаќањата е многу тешко. На постојните кредити, ние бараме поставување на услови за враќање кои не предизвикуваат рецесија и не ги втурнуваат луѓето во уште поголем очај и сиромаштија. Ние не сакаме нови заеми; не може да продолжиме да додаваме долгови врз планината од задолженост.
Конференцијата во Лондон во 1953 година и помогна на Германија да оствари повоено економско чудо со ослободувањето на државата од товарот на грешките од минатото (Грција беше дел од меѓународните кредитори кои учествуваа). Бидејќи штедењето предизвика презадолженост во земјите низ Европа, ние се залагаме за одржување на Европска должничка конференција, која исто така ќе даде силен поттик за растот во Европа. Тоа не е вежба за креирање морален хазард. Тоа е морална должност.
Очекуваме Европската Централна Банка да започне сеопфатна програма за квантитативно олеснување. Тоа е нешто што одамна требаше да биде сторено. Треба да биде воспоставено на доволно висок степен за да ја излечи еврозоната и да и даде значење на фразата “ќе се направи се што треба за да се спаси единствената валута”.
На Сириза ќе и биде потребно време за да ја промени Грција. Само ние можеме да гарантираме крај на неодговорните и корупциските клептократски практики на политичката и економската елита. Досега не сме биле во владата; ние сме нова сила која нема никаква поврзаност со проблеми од минатото. Ние ќе ги спроведеме реформите кои навистина и се потребни на Грција, пишува Ципрас.