Невладината организација Цивил (Центар за слобода) го промовираше новиот проект „Слободни и ненасилни избори 2013“, за јакнење на јавната свест и политичката култура за слободни и ненасилни локални избори. Ова е акција во заедницата на локално ниво за превенција од нерегуларности, насилство и оружено насилство во пред и пост изборниот процес.

Претседателот на Цивил, Џабир Дерала, денеска на прес-конференција информира дека тимови распоредени низ цела држава во девет регионални центри ја набљудуваат состојбата на терен и во медиумите и го набљудуваат начинот на работење на институциите, особено политичките партии.

“Граѓаните кои ќе бидат вклучени во работните групи , ќе примаат информации, кои ќе ги доставуваат до секторот за односи со јавноста, а потоа ќе бидат пласирани до домашната и меѓународната јавност. Во регионалните центри ќе воспоставиме блиска соработка со политичките партии и ќе гледаме нивната активност да ја доведеме во ситуација поднослива за демократските процеси” – соопшти Дерала.

Дерела упати апел до сите политички актери во Македонија дека е крајно време за политичко помирување.

Кристен Шонефелд од Форум цивилен мировен сервис, изјави дека ќе се фокусираат на превенцијата против насилството и вооруженото насилство. Тие ќе овозможат обука за членовите од работните групи за превенција, медијација и ненасилна комуникација и надминување на конфликти.

Проектот „Слободни и ненасилни избори 2013“ почна со имплементација на 17 декември минатата година, а ќе трае до 31 мај годинава. Носител на проектот е Цивил, а финансиски е поддржан од Швајцарската агенција за развој и соработка.