Црниот понеделник е македонската вартоломејска ноќ, правејќи симболична паралела помеѓу крвавите настани од Франција од 16 век и оние од 24 Декември 2012 кога пратениците и новинарите беа насилно исфрлени од собраниската сала додека се носеше буџетот, Фондацијата “Институт отворено општество” ја промовираше книгата посветена на овои случувања, едноставно насловена “Црн понеделник 24 Декември 2012”.
Професорот по уставно право, Светозар Шкариќ зборуваше за правните аспекти од прекршувањата на уставот на 24 Декември, но и за законите кои се гласаат и носат, а кои директно се косат со уставот.
-Идната година ќе славиме 50 години од уставот на Ребублика Македонија, а тој денес е во фаза на умирање. Ете, веројатно нема да има ни потреба да се појавам на таа свеченост, рече Шкариќ.
Претседателот на управниот одбор на ФИОМ, Гордана Дувњак истакна дека оваа книга е сведоштво на грозните дела од 24 Декември кое ќе помогне историјата да ги запамети настаните, но и да спречи да се повторат.
-Не знам што беше поужасно, насилството или одобрувањето на насилството од пратениците на власта, ликувањето и злорадоста со кои беше поздравен триумфот на безумието, кое со ќотек го воведе едноумието во она што требаше да биде повеќепартиски парламент. Врв на резилот беше спокојството на немиот сведок, народниот правобранител, кому Собранието, олеснето од недисциплинираните пратеници, му го изгласа вториот мандат – пишува во воведникот на книгата професорот Владими Милчин.
Радмила Шеќеринска од СДСМ истакна дека и е жал што Теута Арифи не застана во одбрана на жените – пратенички од Собранието кои беа брутално влечени и исфрлени, иако таа ја бранела Арифи кога во 2007 била нападната од ДПА.
Ако ме прашате дали повторно ќе застанам да ја бранам Арифи, мојот одговор е – да, рече Шеќеринска.