Црвениот крст ќе поставува знаци за да ги предупреди на опасност бегалците

Во текот на оваа недела ќе бидат поставени 20 знаци, на 15 црни точки по железничките пруги во државата. Инцијативата е на Црвениот крст во соработка со Високиот комесаријат за бегалци. Таблите ќе бидат светлечки и ќе ги предупредуваат на опасност бегалците кои ноќе се движат по пругите.

Во Црвениот крст велат дека знаците ќе бидат на напишани на осум јазици: англиски, француски, арапски, македонски, урду, дари, банга и тигранија.

„Таблите ќе бидат со димензи 70 на 70 сантиметри и ќе бидат поставувани на метална шипка, таму каде што им опасност по човечки животи,мост, длабок засек или железничка станица., изјави за НОВА Сузана Тунева од Црвениот крст на Скопје.

Мобилни тимови на Црвениот крст ќе започнат да ја следат состојбата уште при влез во државата на границата со Грција, во Гевгелија. Тие ќе разговараат со луѓето, ќе им делат летоци. Во УНХЦР велат дека со летоците кои ќе бидат дистрибуирани ќе се предупредуваат мигрантите на опасностите, но и дека можат да побараат азил или престој во државата. Зачудува зошто оваа организација не превзема мерки за да им помогне на бегалците. Од таму велат дека не сакаат да се мешаат се додека бегалците не побараат азил.

„Тие се во сива зона и се додека не побараат азил, не можеме да се мешаме, велат кратко од таму.

Но, бегалците не си ги знаат своите права, односно нема кој да им ги каже кога ќе влезат во државата. Не знаат дека може да побараат престој во државата, немаат право на превоз со автобус или воз и затоа се движат ноќе по железничките пруги кои им се патоказ кон Србија, а од таму на пат кон Европа. На тоа патешествие се изложени на напади од разни банди и криминалци кои ги пљачкосуваат.

Ова е првпат откако настана хуманитарната криза, во Македонија да се превземаат мерки за безбедност на бегалците кои доаѓаат од Азија и Северна Африка. Деновиве се оргазираа и граѓани по социјалните мрежи, самоиницијативно, од сопствени средства да помогнат во поставување на знаци за предупредување за да им го олеснат патот на бегалците. Но, наместо државата која треба да се организира и да се грижи во вакви ситуации тоа го прават хуманитарните организации и граѓаните.

Пред два месеца, Црвениот крст за првпат донесе лекар сириец, во прифатилиштето во Гази Баба каде што се сметени по 300-400 бегалци, во нехигиенски и нехумани услови иако капацитетот на објектот на старата градинка е само за 100 луѓе.

Македонија се најде на црната листа, со над 27 загинати по железничките пруги, а фотографиите и снимките од прифатниот центар во Гази Баба го поминаа светот и најдоа ударно место во сите светски медиуми.

За новиот бран на бегалци кој доаѓа кон Македонија, за неподготвеноста на државата за хуманитарната криза која и се случува, за катастрофалните услови за престој на бегалците во државата, ќе може да гледате во емисијата ПРОЦЕС, вечерва на НОВА.