Претседателот на Социјалдемократскиот сојуз на Македонија Бранко Црвенковски, попладнево оствари средба со министерот за надворешни работи на СР Германија, Гидо Вестервеле.
Вестервеле, соопшти СДСМ, изрази загриженост за внатрешните конфронтации во земјата и посака што поскорешно нејзино разрешување со цел напредок на земјата како на внатрешен така и на меѓународен план.
Црвенковски, како што се наведува, го запозна Вестервеле со ставовите на опозицијата и изрази подготвеност за политички дијалог кој би довел до политички договор меѓу власта и опозицијата. Двајцата соговорници се огласија околу тоа дека клучно за иднината на Република Македонија е нејзината интеграција во Европската унија и НАТО, се вели во соопштението од СДСМ.
Апел за надминување на политичката криза во Македонија министерот за надворешни работи на Германија, Гидо Вестервеле упати по средбата со неговиот македонски колега, Никола Попоски.
„Не сакам да кријам дека ние сме загрижени заради веќе долготрајната внатрешна политичка криза, којашто се одвива овде во Скопје и затоа јас најенергично апелирам да се почитуваат правилата на демократските игри и да се воспостави една сериозна парламентарна работа. Овој апел е упатен до сите, во смисла навистина да се воспостават едни средени односи врз основа на заемната почит меѓу етничките Македонци и Албанци, врз основа на Охридскиот рамковен договор”, изјави Вестервеле.
„Јас апелирам до сите да ја видат целта, да го видат и да го согледаат националниот интерес, да ја осознаат својата сопствена одговорност, да мислат на судбината и на иднината на вашата земја и да покажат доволна мерка на готовност за компромиси, доволна флексибилност за да се вратат кон една средена демократска соработка”, изјави Вестервеле по средбата со Попоски во Скопје.