Поранешниот претседател на државата, како и поранешен лидер на Социјал демократскиот сојуз на Македонија, Бранко Црвенковски, повика на единство во, како што вели, борбата против режимот на владејачката партија.
„Се што мрда, а што размислува понаку од режимот, треба да биде дел од тоа широко народно движење, не може СДСМ сам да го победи ВМРО, ќе треба да се обедини се во државата и да се урне овој режим. Кога зборува за широко движење не мислам само на македонско, туку мислам ни вистинско, граѓанско мултиетничко движење“ рече Црвенковски вечерва во интервју за телевизијата „Телма“.
Ова е второ обраќање во јавноста на Црвенковски по писменото обраќање од пред десетина дена кога повикан во колумна на новинарката Катерина Блажевска, тој испрати долго писмо во кое ги објаснуваше мотивите за својот молк, но и изрази став за актуелните случувања во државата, како за потезите на власта, така и за потезите на опозицијата.
Црвенковски во писмото му даде поддршка на Заев и на актуелното раководство, но мислењата во јавноста беа измешани. За едни, поддршката беше искрена и писмото не содржеше скриени пораки, а други, пак, во истото видоа најави за идни превирања во опозициските редови.