Денеска во 10 часот, на седница на Извршниот и Централниот одбор на СДСМ која се одржа само два часа пред почнувањето на партискиот конгрес, Бранко Црвенковски потврдил дека нема да се кандидира за уште еден мандат за претседател на Партијата, дознава НОВА од партиски извори.
Со тоа, во игра остануваат постоечките тројца кандидати: Зоран Јовановски, Зоран Заев и Кире Наумов, откако вчера од трката се откажа Игор Ивановски.
Инаку, вчеравечер, на една од Фејсбук страните блиски на СДСМ се појави информација за седница на иницијативен одбор за поддршка на кандидатурата на Бранко Црвенковски. Во неа се вели дека до вчеравечер се пристигнати над 23.000 потписи од членството, додека пак во текот на денешниот ден и до конгресот се очекуваат уште потписи од Охрид, Ресен, Струга и други градови.
„Иницијативниот одбор ги повикува делегатите и пратениците на Конгресот да ја изразат поддршката на лидерот со појаснување дека освен останување на актуелниот претседател, не се согласуваме со ниту една друга можна комбинација и нема да ја поддржиме. “, се вели во информацијата.