Глобалните цени на нафтата нагло паднаа, додека берзите пораснаа откако САД и Иран постигнаа условен двонеделен договор за прекин на огнот, со кој ќе се отвори клучната линија за превоз низ Ормутскиот теснец
Цената на референтната сурова нафта Брент падна за околу 13 проценти на 94,80 долари за барел, додека американската сурова нафта падна за повеќе од 15 проценти и се тргуваше на 95,75 долари, објави Би-Би-Си.
И покрај ова, цените се уште се повисоки отколку пред почетокот на конфликтот на 28 февруари, кога нафтата се продаваше за околу 70 долари за барел.
Цените на енергијата нагло пораснаа во последните недели поради сериозни прекини во снабдувањето со нафта и гас од Блискиот Исток, откако Иран се закани дека ќе нападне бродови што го користат Ормутскиот теснец како одговор на воздушните напади на САД и Израел.
Берзанските индекси во Азиско-пацифичкиот регион нагло пораснаа откако беше објавен договорот.
Јапонскиот индекс Nikkei 225 порасна за 5 проценти, јужнокорејскиот Kospi порасна за речиси 6 проценти, хонгконшкиот Hang Seng порасна за 2,8 проценти, додека австралискиот ASX 200 скокна за 2,7 проценти.
Американскиот претседател Доналд Трамп изјави на социјалните мрежи дека се согласил да го прекине бомбардирањето на Иран за две недели, под услов Техеран веднаш и безбедно да го отвори Ормутскиот теснец.
Аналитичарите велат дека Вашингтон веројатно бил претпазлив поради ризикот дека понатамошната ескалација на конфликтот може да предизвика нагло зголемување на цените на енергијата и сериозни економски последици.
За време на прекинот на огнот, се очекува некои танкери што чекаа во близина на теснецот да продолжат со пловење, што би можело да донесе одредено олеснување на пазарите во наредните недели.
Сепак, експертите предупредуваат дека производството на енергија на Блискиот Исток веројатно нема целосно да се опорави додека не се постигне траен мировен договор.
Поради оштетувањето на енергетската инфраструктура во регионот, обновувањето на производството може да потрае со месеци.
Според проценките на истражувачката фирма „Ристад енерџи“, санирањето на штетата на енергетскиот сектор може да чини повеќе од 25 милијарди долари и да трае со години.
Економските последици од конфликтот особено ги погодија азиските земји кои во голема мера зависат од енергијата од Персискиот Залив.
Филипините, кои увезуваат речиси целата своја нафта од Блискиот Исток, прогласија национална енергетска вонредна состојба кон крајот на март откако цените на горивата се зголемија повеќе од двојно.
Многу авиокомпании во регионот ги зголемија цените на билетите и ги намалија летовите поради наглиот пораст на цените на горивото за авиони, додека владите и компаниите најавија мерки за ублажување на ефектите од високите цени на енергијата и недостигот на гориво.
Експертите предупредуваат дека ќе биде потребно време за да се стабилизираат пазарите на енергија и цените да се вратат на нивоата од пред конфликтот.