Помина еден месец откако Жиле, кучето синоним за Попова Шапка, бранителот на планината, беше застрелан во рбетот од некој посетител во викенд населбата, чиј идентитет полицијата не успеа да го открие.
Кучето на 23 февруари годинава за време на шарпланинскиот куп, откако беше застрелано во рбетот, успеало да се довлечка до една од куќите, барајќи помош, а потоа посетителите го донесоа во Скопје, каде д-р Марин Величковски несебично му ја пружи и се уште му ја пружа целата грижа! Жиле не ги чувствуваше задните нозе.
За овој месец поминавме многу патешествија со цел да го застанеме Жиле на нозе и да го вратиме на Попова Шапка каде што припаѓа, но засега работите се одвиваат потешко отколку што мислевме. Му беа направени рентгенски снимки кои не покажаа дека има оштетувања на рбетот и на карлицата, куршумот кој завршил во бутот му беше отстранет, секојдневно го масираме, го однесовме кај неколку неврохирурзи кои ни дадоа надеж дека Жиле повторно може да прооди!
Со помош на донација од еден хуман професор на Универзитетот во Тетово за Жиле беше нарачана опрема за нозете.
Денеска тој со помош на количка за првпат по еден месец помириса трева! Нам, кои секојдневно сме со Жиле, душата ни се наполни кога го видовме овој борец, кој тежи 50 килограми и има поминато десетици борби со волци на Шапка, како се движи, па макар и со помош на количка! Не може да се опише радоста кога го видовме Жиле како трча со помош на тркалца, како брка муви, како се радува!
Но, за да ја продолжиме оваа битка, потребна ни е финансиска помош од граѓаните. Потребна ни се средства за храна, ветеринарни трошоци, пелени, средства за чистење, а бидејќи се плаќаме од наш џеб, невозможно ни е да издржиме!
Секој што сака да ни помогне, може да донира на
Жиро сметка: 210-066786960188
Налогопримач: ААПЖ
Со назнака: Донација за Жиле
НЛБ Тутунска банка
Да му помогнеме на ова куче повторно да трча по падините на Шапка!