На средбата на премиерите на Република Македонија и на Република Србија се разговарало за унапредување на економската соработка, но акцент било ставено и на решавањето на двете отворени прашања меѓу двете држави: црковниот спор и различните позиции за прашањето за Косово.
Околу косовското прашање Дачиќ побарал од македонскиот премиер воздржување од коментари, со што би дал придонес во дијалогот додека траат разговорите меѓу Белград и Приштина.
„Нашите две држави и понатаму остануваат посветени на продлабочување на соработката, на унапредување на севкупните односи на секое ниво од билатерална соработка и на развој на проекти што ќе имаат силна улога во развој на економијата”, изјави премиерот Груевски.
Премиерите Никола Груевски и Ивица Дачиќ договорија заедничка седница на македонската и српската влада, што според првично договореното, би се одржала во мај во Белград.
„Се договоривме некаде во мај, доколку ни дозволат условите, во Белград да биде одржана седница на двете влади. Не на целите влади, туку на министрите од оние ресори за кои сметаме дека се важни за нашите билатерални односи, да ја разгледаме актуелната ситуација по сите овие теми и тоа би требало да биде придонес за нашата соработка и состаноците би требало да бидат редовни и да се одржуваат еднаш годишно кај вас и кај нас”, изјави српскиот премиер Дачиќ.
Коментирајќи го спорот меѓу Македонската и Српската православна црква, двајцата премиери понудија помош за негово надминување, но посочија дека договорот зависи од двете цркви.