Според српскиот министер за надворешни работи и претседавач со Организацијата за безбедност и соработка во Европа (ОБСЕ).Ивица Дачиќ, политичката и безбедносната криза во Македонија е проблем за ОБСЕ, но и за целиот регион, вклучувајќи ја и Србија.
– Кога пред три месеца бев во Македонија, веќе тогаш се гледаа знаци на криза. Овде постојат два вида проблеми, политички и безбедносни, кои не можат да се одвојат поради тоа што постои судир на власта и опозиција, но и помалку изразени меѓунационални судири. Појавата на терористички банди и човечки жртви е доста опасна, вели Дачиќ во дебатата на РТС.
Поранешниот премиер на Србија вели проблемите во земјава можат да се решат само со политичка волја и европска перспектива.
– За 20 години ЕУ не организирала ниеден состанок на тема Македонија, додека истовремено Косово е постојана тема, иако постои поголема опасност од натамошниот развој на настаните во Македонија, на која Србија ѝ посакува стабилност, изјави министерот на Србија, кој смета дека Меѓународната заедница носи одговорност за кризата во Македонија.
Запрашан зошто европските претставници избегнуваат да го дефинираат вооружениот судир во Куманово како терористички акт или етнички судир, Дачиќ смета дека постои желба кај европските политичари на Балканот да се создаде граѓанско општество, што според него воопшто „не е лесно“.
Во дебатата учествуваа и македонскиот политичар аналитичар Сашо Орданоски и српскиот надворешно политички коментатор Бошко Јакшиќ.