Се ангажираат и покануваат на телевизиите психијатри, невропсихијатри, психолози, добога, мора да се најде дијагноза за премиерот Груевски, после се.
Мегаломанскиот проект Скопје 2014, бомбите на Заев, грандиозните слики на неговото семејство со пошироката фамилија од ВМРО-ДПМНЕ, гатачката со која разговара со часови, зарем не се доволен доказ дека овој човек има проблем, се прашува поголемиот дел од светот.
Психички, психолошки, ментален, умствен, некаков сериозен проблем веројатно има, задоволно заклучува тој ист дел од светот и продолжува да ги слуша новите бомби, овој пат не од Заев, туку од непознат сторител.
Како протекуваат снимките, од кого- исклучително важно е да се знае- кој е кртот, кој е свиркачот кој почна да доставува траги-комични содржини, кои за жал, очекувано, се далеку од шекспиријански маштап. Господството не живее таму, особено не во околината на Груевски, а во евтината индиска сапуница е вклучена и божицата- гатачка.
Но, кртот, што со него? Кого да се праша, како да се стапи во контакт со кого било од таа зграда на ВМРО, кога таму одамна има молк.
Застрашувачки молк. Се разбира, од време на време се слуша некој врисок, некој тап удар и нечие стркалување по скалите, но така е секогаш во политичкиот хорор.
Но, едно е сигурно. Не, Груевски не е луд. Тоа е амнестијата на која тој се надева и доколку се докажат делата за кои е осомничен, под такво образложение и ќе биде ослободен.
Политичките одлуки се правени свесно, во полна физичка и психичка форма, зошто би се имало дилема?
Ставете ги под прашање интелектуалниот капацитет, начинот на кој се стекнувало формалното образование, непостоење на неформално образование, ниските страсти, примитивниот однос кон се што го опкружува овој човек, кој се замрзнал во средниот век и така и се однесува низ целото свое владеење.
Во стилот на африканските племиња, кои и денес практицираат гатачки и бајачки, нашиов премиер, во транс од хипнозата на гатарата, бил сосема зависен од нејзините ритуални вештини. Доколку добиел инструкција од неа, тој ќе расчистел со се што е надвор од нејзината милост, но со исклучок на неговата величина.
Егото му го храни и негува со часови, месеци, можеби и години, оваа средновековна гатачка, како вистински примерок на мрачното средно доба, во кое игнорирањето и суеверието се единствените посакувани сили кои владеат со светот.
Бесценатата бомба со гатачката е доказ за жената која владеела со него и оттаму и со нас. Жената која црпела од него и информации и го насочувала во креирање на хаосот, теророт и свирепоста со која се владеело, како и уништување на секоја мала надеж доколку таа не ја предизвикала и одобрила.
Ве молам затоа, Груевски не е луд. Но, добро е затоа, да се испита лудоста на се што не опкружува, за да се добие одговорот- зошто дозволивме да ни се случи Груевски ?