Дали грчките археолози се пред откритие на гробницата на славниот освојувач Александар Македонски?
Ископувањето на северот на Грција трае повеќе години. Работата на археолозите беше во еден период прекината поради кризата и недостиг на пари. Но според “Катимерини” археолозите сега се на чекор пред отворањето на гробницата од која ги дели само еден ѕид.
Минатата недела премиерот на Грција Антонис Самарас го посети местото Амфиполис на северот на Грција на стотина километри од Солун и со тоа повторно се отворија шпекулациите дека на ова место археолозите ќе откријат нешто многу импресивно штом премиерот одлучил да дојде.
“Мислиме дека ни требаат две до три недели за да влеземе во гробницата и да изведеме заклучоци”, изјави министерот за култура Костас Тасулас.
Археологот Катерина Перистери, која ги води ископувањата, вели, за агенцијата АФП, дека календарот го наметнува самата работа на археолозите и дека е тешко да се каже кога ќе биде откриена мистеријата на маузолејот, објавува грчката прес агенција Ана.
Самарас изјави дека е сигурен дека археолозите се наоѓаат пред “многу важно откритие” во регионот на централна Македонија која е срцето на кралството на Александар Македонски кој живеел од 356 до 323 година пред Христос.
Прашањето на кое треба да одговорат археолозите е – кој ја имал честа да лежи веќе 2.500 години под импозантната купола висока три метри и заштитена од ѕид од 500 метри? Според хипотезите тоа можеби е Роксана, персиската жена на Александар или Олимпија, мајката на кралот или пак некој од неговите генерали или придружници.
Археолозите претпоставуваат дека гробот е направен по смртта на Александар но не се знае кому тој му припаѓа, вели Перситери.
Историјата вели дека по смртта на Александар Роксана и нејзиниот син биле убиени во 310 пред Христос од страна на генералот Касандра кој потоа ќе стане крал на Македонија.
На врвот на ѕидовите има лавови и две сфинги на влезот кои датираат од 325 и 300 година и тие се доказ дека за “спектакуларниот” споменик, вели Перситери.
Сепак, археолозите признаваат дека се минимални шансите на ова место да се најде гробот на Александар. Најголемата желба на историчарите и археолозите во целиот свет е да го откријат гробот на Александар.
Според експертите, Александар умрел во Вавилон на 32 години и неговото тело било закопано во Александрија во Египет. Но и покрај напорите на експертите, неговите остатоци до денес не се пронајдени.