В среда попладне во Виена ќе се одржи нова средба на министрите за надворешни работи на Македонија и на Грција Никола Димитров и Никос Коѕијас со посредникот во спорот за името Метју Нимиц.
Засега нема најави за што ќе се разговара на оваа средба, откако на последната што се случи во Охрид на 12 април, министерите заклучија дека прегвоорите напредуваат, но остануваат клучните прашања.
Грчкиот информативен портал Ин објави дека новата средба се планира под голема тајност. Според порталот, на средбата се очекува да се разговара за временската рамка за спроведување на евентуалниот договор.
-Многу веројатно е новите разговори да се однесуваат на временскиот период, нешто што се спомена и по средбата во Охрид, пишува Ин.
Димитров и Коѕијас во Охрид најавија средби и на двете конференции во Грција, едната на 3 и 4 мај во Солун, другата една седмица подоцна во Сунио.
Можно ли е решение до јуни
Според анализата на Радио Слободна Европа, има оптимизам, да биде постигнат договор до јуни.
Универзитетскиот професор Љубомир Фрчкоски го истакнува грчкото барање за ерга омнес употреба како важно останато прашање за кое, како што вели, е потребна политичка волја и дипломатска умешност.
-И таму ако најдат решение со вградување на временска клаузула во договорот, тоа да не биде веднаш, туку при влегувањето на Македонија во Европската унија, кога ќе се отвора Уставот и така поради членот 118 кој значи директна примена на европското законодавство во правниот поредок, тој момент да се искористи и за насловот на Уставот, што мислам дека таквото решение е можно и реално да биде изведливо тука, вели Фрчкоски за РСЕ.
Во врска со изјавите изјавите на Коѕијас, за тоа дека е невозможно земјава во јуни да влезе во НАТО поради кусиот временски рок и изјјавата на коментарот на министерката за одбрана Радмила Шекеринска дека таквите изјави не се изненадувачки и дека таквите ставови се слушаат и од Москва, политичкиот аналитичар Алберт Муслиу вели дека грчко-руските односи се традиционално добри, но дека во овој случај тие нема да играат пресудна улога.
-Тоа не е спорно, но не беше спорно ниту во почетокот на интензивирањето на преговорите за името и верувам дека во нашиот случај тоа нема да има пресудно влијание, вели Муслиу.
И за професорот Фрчкоски „би било препесимистички да се каже дека на тој начин влијае во грчката политика“.
Тој смета дека Владата на Ципрас која треба да најде мнозинство и излезно решение и тоа да го спакува, е под голем притисок на опозицијата, но како што вели тој е оптимист дека тоа ќе се случи со што евентуална идеја, овој регион да остане надвор од НАТО нема да успее барем кога е во прашање Македонија.