Потегот на СДСМ да не се признаат изборите веднаш после завршување на изборите, без да се знаат резултатите е оспорување на цел изборен процес, објаснува за НОВА Александар Новаковски, поранешниот претседател на ДИК.
– Доколку СДСМ не поднесе приговори за евентуални изборни нерегуларности , овој потег може да се смета политички. Избирачките одбори имаат мнозинство и без членовите на СДСМ да го заокружат овој изборен циклус, образложува Новаковски.
Експертите за НОВА појаснуваат дека одлуката на СДСМ може да биде испроблематизирана од избирачките одбори во правна смисла, кои би ја продолжиле процедурата на изборниот процес и дел од петчлената комисија на општинските одбори да ги потпише записниците.
Причината за овој потег е во фактот што во таа комисија членуваат тројца државни службеници, односно претставници на администрацијата, еден претставник на опозицијата и еден претставник на партијата која има мнозинство во парламентот, односно власта.
Во овој случај, тројцата претставници од државната администрација во избирачките одбори не би требало да смејат да се повлечат, согласно фактот што непризнавањето на изборите е прогласено од политичка партија, а бирократите се непартиски.
Четвртиот потпис би требало да биде од претставник владејачката партија и оттука, записниците би ги потпишало мнозинството- тројца административци и еден претставник на власта.