Без никаква причина, Министерството за правда понуди законско решение во кое се фаворизира еден државен орган во состав на Министерството за правда, а тоа е Бирото за судски вештачења, наспроти сите останати вештаци и здруженија кои постојат во Република Македонија, рече од говорницата пратеничката Ана Павловска – Данева, по предлог на закон за изменување и дополнување на Законот за вештачење.
– Досега кога ќе се појави потреба од судско вештачење, се распишува тендер. Се распишува конкурс на коишто конкурираат сите и во зависност од тоа, кој ќе ја даде економски најповолната понуда, се избира вештакот. Тоа беа должни и се уште го прават сите државни органи. Распишуваат конкурс за јавни набавки. И одлучуваат кој вештак, врз основа на економски најповолната понуда на суд ќе го изврши вештачењето
– Одеднаш, Бирото за судски вештачења ќе стане орган кој што ќе ги опслужува сите државни институции, без за тоа да се распишува јавен тендер или конкурс за јавни набавки, потенцираше Данева.
Таа праша: зошто, по кои критериуми и врз основа на кои причини одлучи дека одеднаш, Бирото за судски вештачења треба да се стави над сите останати вештаци?
– Со законот што ни го предлага Министерството за правда, се промовира нееднаквост. Универзитетски професори од најразлични факултети имаат стекнато лиценци за вештаци. И машински инженери, електро инженери и шумарски и економисти, и доктори полагале за да се стекнат со таа лиценца. И платиле пари на државата.
– Министерството за правда ни должи објаснување, зошто сега сите овие ги занемаруваме? Зошто Бирото за судски вештачења треба да ги опслужува сите државни институции и сите јавни институции без да конкурира? Без да овозможи еднаков третман на сите останати вештаци, истакна Данева.