Режисер на документарни филмови, граѓански активист, но и добар познавач на состојбите на Балканот, Дарко Соковиќ е лидерот на тимот Докукино и специјален гостин на годинашната конференција „Engage“. Зa себе вели дека целиот Балкан е негов дом, а неговата работа е будење на граѓанскиот активизам преку употреба на новите друштвени медиуми и информатичка технологија. Во интервју за Радио МОФ, тој зборува за соработката на граѓанскиот сектор со државните институции, за тековните проекти и потребата од граѓанско будење.
Што значи да си граѓански активист на Балканот?
Тоа значи дека ти е важно во какво општество живееш, значи дека ти е важно како тоа општество ќе изгледа утре, но значи и дека тоа како живееш има врска со начинот на водење на државата во која ти ги остваруваш своите права. Ние во Докукино мислиме дека креативноста и силата на граѓанските организации се повеќе расте во регионот.
Имаме ли „Супер граѓани“?
Да, јас мислам дека имаме и мислам дека се повеќе луѓе сфаќаат дека јавната власт во нашите земји не е нешто што е одвоено од нас, нешто што мора да го истрпиме и нешто против што сме. Сфаќаме дека ние со таа власт нешто можеме, но и власта е нешто на кое мораме да влијаеме. Јас мислам дека тоа се „супер граѓани“, тие кои се бават со оние мали работи во своите заедници и ги тераат работите напред.Мислам дека тие луѓе ги има се повеќе.
Вие работевте на еден таков проект?
Тоа го направивме во Докукино. Станува збор за една онлајн мапа на насилството во Србија. Идејата беше луѓето кои биле жртви или забележале вакви проблеми сами да ги пријават по интернет. Со проектот сакавме да им покажеме на граѓаните дека може и со бесплатни алатки да направиме нешто, да и помогнеме на полицијата, на медиумите, на нив самите…
Дали Владата ги слуша граѓаните? Какво е вашето искуство?
Малку. Ние работиме во цел регион, имаме канцеларии во Белград и Сараево, а сараевската канцеларија има регионални проекти.Владата малку ја интересира што граѓаните мислат, но работите полека се менуваат. Така на пример, владата на Хрватска, според некои независни истражувања, е прва во светот по онлајн-интеракција.Слични примери во некои сегменти има во Србија, тоа почнува да се случува и на Косово, во Македонија постојат некои од идеите за примена на принципите за „Open government partnership“, во Црна Гора се воведе Е-петицијата. Мислам дека тоа станува едно регионално движење кое повеќе нема да може лесно да запре. Ние сега само се обидуваме да ги убрзаме работите.
Дали со проектите на регионалната организација „Докукино“, си создадовте нептијатели во државните институциите?
Ние се трудиме да развиеме пријателски однос. Со нашата програма „Влада 2.0“ работиме на две нивоа. Првото е работа со државните институции. Ние не излегуваме на улица за да бараме да отворат Твитер и да не чујат, туку влегуваме во институциите и им покажуваме како може да ја подобрат својата работа со користење на новите алатки. Тоа воопшто не е лесно…
Во продолжение може да го слушнете целото аудио интервју со Дарко Соковиќ.