Владата на Заев ќе се проширува со министри од ДПА, Беса на Гаши и Сојузот на Ромите на Амди Бајрам кој нема да добие министерско место, туку функција во пониските ешалони на извршната власт.
Предлогот за реконструкција на Владата се очекува до крајот на неделава да биде испратен во Собранието. До тогаш партиските органи на новите владини партнери ќе треба да го верификуваат изборот на кадри кои ќе бидат предложени за членови на Владата на Заев.
ДПА на Централното претседателство одлучи да ги номинира Бардил Даути, професор по економија на Тетовскиот Универзитет, за министер за инвестиции и д-р Митасим Беќири за заменик министер за транспорт. Беќири е професор по казнено право и казнена политика на ФОН.
Даути беше и пратеник во Собранието, но поднесе оставка кога се кандидираше за градоначалник на Тетово. Тој доаѓа на местото на Рамиз Мерко кој беше избран за градоначалник на Струга. Заменик министер за транспорт беше кадар од Алијансата на Алабнците на Села, која ја напушти Владата.
Лидерот на партијата Мендух Тачи, против кого СЈО го води предметот „Титаник 3“ за изборни неправилности, нема да биде член во Владата.
За понудата од Заев вечерва ќе заседаваат Централното претседателство и одборот на крилото на БЕСА предводено од Африм Гаши. На заседанието на партиските тела ќе се разгледува понудата од премиерот Заев – за министерско место во култура или во образование и за едно заменичко. И на двете министерски места е кадар на СДСМ.
Како најсериозен кандидат за министерската позиција од БЕСА се споменуваше пратеникот Зекирија Ибраими но официјално од БЕСА демантираат дека е донесена ваква одлука. Премиерот Заев денеска не сакаше да зборува кои министри од СДСМ може да бидат сменети и дали ќе има рокада со ДУИ за министерските позиции во образование и правда.
„Не би сакал да зборувам додека се уште не заврши процесот на одлучување – не сакам да си играм со судбината на луѓето кои и служат на државата“, рече Заев. Тој ги коментираше и изјавите од ДУИ дека Али Ахмети, а не премиерот, одлучува кои министри од ДУИ ќе се менуваат и рече дека тој како мандатар го има последниот збор.
„Како мандатар сум овластен да предлагам, да разговарам со политичките партнери. Секој во своите редови преговара, но на крајот конечниот предлог е на премиерот. Процесот на одлучување е сѐ уште во тек. Сакам да бидам внимателен и веднаш штом ќе бидат познати ќе ѝ соопштиме на јавноста – рече Заев.
Деновиве се очекува да има средба меѓу СДСМ и ДУИ за да се договори поделбата и на заменичките позиции кои беа на членови на Алијансата на Албанците. Неофицијално ДУИ бара нејзин кадар да биде избран и на раководна позиција во Министерството за здравство, каде и министерот и заменикот се на предлог од СДСМ.
По изборот на новите министри и заменици министри ќе следуваат и смени на директори на институции, претпријатија и фондови.