АД Електрани на Македонија ги демантира наводите објавени во текстот „ЕЛЕМ го раскина договорот за РЕК, можна е тужба во Париз“.
Порталот наведува дека основна цел на модернизацијата на котлите во ТЕ Битола е продолжување на работниот век на термоелектраните. Со модернизацијата на ТЕ Битола 2 и 3, таа цел и е реализирана. Животниот век на предметните термоблокови од 200.000 работни часови веќе е постигнат и надминат, а со модернизацијата на котлите согласно барањата на АД ЕЛЕМ, тој е продолжен за уште 120.000 работни часови. Ваквиот зафат беше потребен и оправдан затоа што доколку не се спроведеше, термоблоковите во РЕК Битола денеска ќе беа нефункционални. Станува збор за исклучително сложени техничко технолошки системи кои не трпат било какви импровизации. Повремените застои се сосема вообичаени во вакви и слични постројки, не само кај нас, туку и секаде во светот. Станува збор за вообичаени технолошки погонски процеси кои се присутни во ТЕ Битола, од вклучувањето на блоковите во производство пред четири децении, но очигледно само во Македонија, на таквите настани особено во последните десетина години им се дава политичка димензија. Одредени поединци со години се обидуваат да заработат дневно политички поени само за да ги скандализираат сите погонски настани и тековни активности во комбинатот.
Понатаму, како што пренесува Нова ТВ, АД ЕЛЕМ го раскина договорот со изведувачот затоа што и после процесот на оптимизација, изведувачот не успеал да постигне дел од декларираните техничко технолошки параметри содржани во тендерската документација. Иако е постигната примарната цел да се продолжи работниот век на термоелектраните и да се намали емисијата на азотни оксиди согласно строгите ЕУ директиви, дел од поставените барања не се реализирани според очекувањата. За ова сведочи и писмен документ во кој стручна работна група од АД ЕЛЕМ и РЕК Битола формирана за таа намена, како и консултантот во процесот германската компанија „RWE“ потврдуваат дека дел од бараните параметри во фазата на оптимизација не се постигнати. Како инвеститор на зафатот, инсистираме сите декларирани перформанси без исклучок да бидат постигнати, согласно бараните параметри. Тоа е политика на компанијата, не само за овој проект, туку за сите зафати кои ги реализира во рамките на својата дејност.
И на крај, целосно ги отфрламе тезите дека увозот на електрична енергија во земјава е резултат на модернизацијата на РЕК Битола. Не е точно дека Македонија повеќе увезува после предметниот зафат. Како што веќе објаснивме, со либерализацијата на пазарот за електрична енергија, што како процес се одвива во изминативе десетина години АД ЕЛЕМ нема законска обврска да обезбедува електрична енергија за сите потрошувачи.
Целиот демант можете да го прочитате на следниот линк.