Основниот суд Скопје 2 испрати демант до редакцијата на НОВА, во однос на текстот „Професорите бојкотираат, судиите незаинтересирани кој ќе ги разрешува“. Во продолжение, демантот го објавуваме интегрално:
„Во однос на текстот на новинарот Саше Димовски објавен на НОВА ТВ на 10.07.2015 година, во 15:00:42 часот, поврзан со гласањето за избор на членови на Советот за утврдување на факти и покренување на постапка за утврдување на одговорност на судијата, одржано во Основниот суд Скопје 2 Скопје, во целост ги демантираме наводите во текстот во кои вели „се гласаше од 8 часот до 15 часот, но скопска двојка спротивно на времето за гласање во 14 часот го заврши гласањето“.
Согласно Упатството за гласање за Изборните одбори, донесено од Комисијата за спроведување на избори на членови на Советот за утврдување на факти и покренување на постапка за утврдување на одговорност на судија од 06.07.2015 година, Избирачкиот одбор може да го затвори гласачкото место и пред 15,00 часот, ако гласале сите судии запишани во изводот од Судскиот избирачки именик.
Имајќи го предвид наведеното, како и со оглед на тоа дека во Основниот суд Скопје 2 Скопје гласале сите присутни судии кои се запишани во изводот од Судскиот избирачки именик, Изборниот одбор во Основниот суд Скопје 2 Скопје го затвори гласачкото место пред 15 часот.
Основниот суд Скопје 2 Скопје го цени правото на слободно информирање, но не и она што е дизајнирано да ја ослаби јавната перцепција за Судот, притоа, преминувајќи ги границите на одговорно новинарство.
Од овие причини бараме овој демант да биде објавен соодветно, како што е објавен и текстот на Саше Димовски“, гласи демантот, кој НОВА го објавува на истата позиција каде што беше и текстот на новинарот Димовски.