Денеска во Основниот суд Скопје 1 сведочеше братот на првообвинетиот за тероризам за Смиљковскиот масакр, Алил Демири, воен старешина вработен во АРМ, кого на 1 мај полицијата го уапси како дел од групата која беше приведена во акцијата „Монструм“, јавува порталот Плусинфо кој го следеше судското рочиште.
Сведокот, критичната ноќ, на 12 април лани кога се случи убиството бил на работа во касарната Илинден, имал дежурство од 36 часа. Со брат му Алил се сретнал следниот ден во Арачиново, биле на ручек кај нивните родители. Пред Судот потврди дека брат му Алил во Македонија не е од 24 или 25 април лани, кога последен пат го слушнал телефонски.
– Дента на 24 или 25 кога се слушнавме ми кажа дека ќе оди во Белгија, а неговиот автомобил го оставил кај вујко ми Бедри, па ми кажа после 5 дена да го земам и да го вратам кај мајка ми и татко ми. Неговиот телефон кој го оставил во колата, рече да ѝ го дадам на сестра ми. И неа полицијата заедно со мене нè уапси на 1 мај, а потоа нè ослободија – сведочеше братот на Алил Демири.
Сведокот не знаеше кај кого во Белгија имал намера да оди неговиот брат, дообјасни дека обвинетите браќа Исмаиловиќ во Белгија имале еден брат.
На прашање од судот дали некогаш го предупредил обвинетиот за тероризам Сејди Рами да не излегува од Арачиново, бидејќи во близина има полиција, сведокот потврдно одговори.
– Во еден наврат му се јавив на Сејди и го предупредив дека полицијата е кај бензинската на влезот од Арачиново. Полицијата беше со возило какво што имаме во Армијата и кола „крајслер“. Го предупредив бидејќи возилото не му беше регистрирано, па затоа кажав дека има полиција кај бензинската – објаснуваше сведокот во судницата.
И денеска главниот претрес за случајот „Монструм“ се одржа без двајцата првообвинети за тероризам Алил Демири и Африм Исмаиловиќ. Против нив минатата недела во Косово започна судски процес за оружјето кое беше пронајдено кога двајцата бегалци беа уапсени.
Судскиот порцес во Косово го води судија од ЕУЛЕКС. Нивната екстрадиција за случајот „Монструм“ најверојатно ќе се одложи на извесно време. На двајцата во Македонија им се суди во отсуство.
Текстот е превземен од новинскиот портал Плусинфо.