Муарем Демиров, бездомникот кој наместо да биде опериран е сместен во Психијатриската болница во Бардовци не е психијатриски случај и во моментот е во многу тешка здравствена состојба поради гангрената на двете стапала добиена од студ. НОВА го пронајде на интерното одделение каде што не дочека непријатна миризба поради раните од кои му се распаднати стапалата. Блед , со последни сили раскажа дека ниту една болница не сакала да го прими и моли и да му се пружи медицинска помош.
„Не знам зошто не бев опериран на торакална хирургија. Јас и претходно барав помош но, нити една болница не сакаше да ме прими, имам многу болки во нозете, рече Муарем Демиров за НОВА.
И во Психијатриската болница во Бардовци потврдија дека Демиров не е психијатриски случај. Тој таму бил донесен со возило на Итната медицинска помош од Клиниката за торакална хирургија каде што требаше да биде опериран и тоа веднаш откако јавно пред камерите екс директорот Зоран Спировски и министерот Арбен Таравари ветија дека ќе биде згрижен и опериран на клиниката. Залудни биле напорите и укажувањата на раководството од Психијатриската болницата во Бардовци, дека Демиров не е за таму и барањата до Министерството за здравство и Центарот за социјални работи да биде соодветно згрижен.
„Демиров беше донесен на 8 јуни со возило на Итната медицинска помош од Клиника за тораклна хирургија. Тој не е за кај нас, не психијатриски случај. На почеток беше вознемирен, но ние го смиривме со терапија. Од Министерството за здравство баравме инструкции како да постапиме понатаму, но не добивме одговор, исто како и од Ценатрот за социјални работи што не ни одговорија, изјави за НОВА Ќамил Ковачи директор на Психијатриската болница во Бардовци.
Од Хелсиншкиот комитет за човекови права бараат итно да му биде пружена медицинска нега, а потоа да биде соодветно згрижен, одговорност за случајот ќе бараат од министерот Таравари. Тие денеска по кратка расправија на влезот во болницата откако не им беше дозволено да влезат успеаја да го посетат Демиров, а по што и директорот Ќамили на увид ја даде целокупната документација на пациентот.
„ Разговараме со Демиров и тој ни рече дека сака да му биде пружена медицинска нега. Ќе бараме одговорност од министерот Таравари и од психијатарот кој проценил дека требада биде пратен тука. Со оглед на фактот дека министерот даде изјава во јавноста дека пациентот ќе ја добие целосната медицинска грижа, истиот морал да биде информиран за исходот од неговото лекување и третман. Со ова е нарушено основно право на пациентот да биде лекуван само врз основа на тоа дека е бездомник“, изјави Уранија Пировска извршен директор на Хелсиншкиот комитет за човекови права.
Министерот Таравари тврди дека Демиров имал одредени психо –органски проблеми и дека неколку пати бегал од Клиниката за торакална хирургија. Но, не објасни како можел да бега со такви нозе, кога Демиров не може да се движи. Тој најави дека веднаш ќе се заинтересира и ќе се преземат чекори за соодветно да биде третиран.
„Најодговорно тврдам дека пациентот има одреден психо органски синдром, што е психијатриска дијагноза, гарантирам и тврдам. Во текот на денешниот ден ќе се распраша и ќе се преземат соодветни активности за да биде биде соодветно згрижен, изјави министерот Арбен Таравари.
47 годишниот бездомник беше пронајден пред болницата „8 Септември“ на почетокот на јуни и откако медиумите ја објавија сторијата надлежните ветија дека ќе му се пружи медицинска и институционална грижа. Тој во Психијатриската болница во Бардовци се наоѓа 3 и пол месеци чекајќи да му биде пружена медицинска нега и институциите да се договорат каде ќе биде згрижен понатаму.