Демократските конгресмени во САД го оспорија „очигледниот обид“ на администрацијата на претседателот Доналд Трамп да ја спои Американската агенција за меѓународен развој – УСАИД со Стејт департментот, што го доведува во прашање финансирањето на програмите за помош ширум светот, вклучително и милијарди долари во развојна помош за Украина.
Како што јавија американските медиуми, пратениците се собраа пред седиштето на УСАИД во центарот на Вашингтон за да го критикуваат, како што го нарекоа „незаконски маневар“ на извршниот директор на „Тесла“ и „Спејс Икс“, Илон Маск, кого Трамп го задолжи да го намали обемот на владиното трошење.
Тие го одржаа собирот во знак на протест по извештаите дека вчера на вработените во агенцијата им било кажано да не доаѓаат на работа, а потоа им бил забранет пристап до официјалните мејлови и други сметки, додека агенцијата се чини дека е во процес на затворање, јавува Радио Слободна Европа.
Џејми Раскин, претставник на државата Мериленд, вели дека не знаат кои се мотивите на Маск, „но тие немаат никаква врска со она што легално го усвои народот на САД преку Конгресот.
„Ќе ја браниме УСАИД до крај“, додаде тој.
Сенаторот Крис Марфи од Конектикат рече дека потегот на новата администрација создал уставна криза и вети дека ќе се бори против неа.
Народот одлучува како ќе се трошат нивните даночни пари. Илон Маск не одлучува, рече тој, исто така говорејќи пред зградата на УСАИД.
Марфи го нарече овој потег „обид да се предаде владата на неколку неизбрани милијардери и корпоративни интереси“, но нагласи „нема да им дозволат да го сторат тоа“.
УСАИД е независна владина агенција основана од Конгресот во 1961 година и има приближно 10.000 вработени ширум светот.