Ноќеска, спроти Денот на сесловенските просветители Кирил и Методиј, непознати сторители го демолираа Музејот на албанската азбука во Битола.
Скршено е стаклото на влезната врата, насилно отворен музејот и демолирани се просториите на вториот кат каде е музејската поставка.
Уништени се витрините во кои се чуваат копии од историски документи. Скршени се и неколку прозорци од зградата, врз кои хулиганите фрлале со камења од надвор.
Полицијата направила увид и трага по сторителите.
-Искршени се стаклата на девет од единаесет витрини во кои има документи кои сведочат за формирањето на албанската азбука, а неколку витрини се превртени низ музејот, изјави директорот на НУ Музеј на албанската азбука во Битола, Газменд Хоџај.
Тој додава дека се работи само за материјална штета, но и расипување на еден државен празник, Денот на словенските просветители.
-Апелирам да не дозволиме поединци и изолирани групи да го нарушат соживотот и во градот и во државата, изјави Хоџај, кој смета дека некој се обидува да крева меѓуетнички тензии токму на денешниот празник.
Во минатото неколкупати се испишувани недолични пароли на фасадата и оштетувана е плочата поставена на зградата.
Она што е недопустиво е фактот што музејот е обезбеден само со клуч на старата дрвена врата.
Музејот на албанската азбука во Битола е отворен минатата година, сместена во објектот каде што пред 105 години се одржал познатиот Битолски конгрес на кој група албански интелектуалци ја создадоа и унифицираа денешната албанска азбука.