На 24 август, Украина го одбележува најголемиот државен празник – Денот на Независноста на Украина. Тој е основан во чест на исклучителен историски настан – усвојувањето во 1991 година од страна на Врховната Рада на Украинската ССР, со апсолутно мнозинство гласови, на Актот за прогласување независност на Украина. Овој документ ги круниса илјадагодишните аспирации на Украинскиот народ да има своја суверена држава и самостојно да ја одредува својата судбина.Прогласувањето независност е логичен заклучок на украинската државотворност, со оглед на тоа дека Украина ја слави илјадагодишната историја на својата државност. Треба да се почитуваат сите претходни фази – Кијивска Рус, Кнежеството Галиција-Волин, Големото Литванско Војводство, Украинската козачка држава, украинските државни формации од почетокот на ХХ век. Модерна Украина од нив ги наследи традициите на државноста.
Слободата и достоинството отсекогаш биле основни вредности за Украинците. Тие ја поттикнуваа борбата за независност. На почетокот на ХХ век, за време на Украинската револуција од 1917-1921 година, украинскиот народ успеа да ја оживее државноста, а на 24 август 1991 година истата беше обновена со Актот за прогласување независност на Украина. Усвојувањето на Декларацијата за државен суверенитет на Украина на 16 јули 1990 година беше важен чекор кон враќањето на историската правда. Тогаш Врховната Рада на Украинската ССР ја поддржа желбата на народот да ја елиминира политичката и економската зависност од московскиот центар и да изгради независна држава, да ја оживее националната култура и историската меморија.
Вековите без државност го чинеа Украинскиот народ неверојатни жртви. Само во ХХ век, милиони Украинци загинаа како резултат на Гладоморот, Холокаустот, државниот терор, депортациите и војните. Украинците паметат дека само силната сопствена држава е гаранција дека таквите трагедии нема да се повторат.
Појавата на суверена Украина одигра одлучувачка улога во распадот на СССР, конечното уништување на комунистичкиот тоталитарен систем. Ова го означи почетокот на нова етапа во развојот на демократската модерна Украинска држава. Денес, независноста на Украина е гаранција за слободниот развој на државите и народите во Европа и главната пречка за рускиот империјализам, кој се обидува да ја апсорбира Украина политички, економски и духовно. Во моментов, во услови на крвава вооружена агресија на русија против Украина, Украинците ја продолжуваат својата борба за сопствена Слобода и Независност.
Украинците се принудени да го бранат својот територијален интегритет и суверенитет од вооружената агресија на државата-терорист рф. Ова е борба не само за луѓето и територијата, туку и за правото да бидат свои, сами да одлучуваат како да живеат и каква иднина да изберат.
Силна и слободна украинска држава, активно и одговорно граѓанско општество и моќни вооружени сили се она што гарантира достоинствена и прогресивна иднина за сите Украинци и Европа.
Годините на независност му покажаа на светот дека Украина се појави како држава способна да ги афирмира демократските вредности, да ја брани слободата, достоинството и различноста, да го заштити својот суверенитет и интегритет. Украина успеа да изгради толерантно општество во кое различни етнички, верски и општествени групи наоѓаат заеднички јазик и меѓусебно почитување.
Украина ќе победи!
Слава на Украина!
На Хероите Слава!
Амбасада на Украина во Република Северна Македонија