Вработените во Македонската филхармонија денеска ќе одржат нов протест пред Министерството за култура и туризам, поради, како што велат, постоење на сомнежи дека конкурсот за избор на нов директор на оваа установа се спроведува незаконски.
Протест одржаа и пред една недела, при што добија ветување од министерот за култура и туризам Зоран Љутков дека конкурсот ќе биде спроведен законски и дека ќе биде избран најдобриот кандитат кој ги исполнува условите.
Пред точно една недела добивме ветување од министерот Зоран Љутков дека конкурсот за избор на директор на Македонската филхармонија ќе биде спроведен законски и дека ќе биде избран најдобриот кандитатот кој ги исполнува сите услови пропишани со Законот за култура. Во меѓувреме, добивме информации дека конкурсот веќе се спроведува незаконски, и дека по секоја цена се оди кон тоа меѓупартиски договорениот кандидат Мустафа Имери да биде назначен за директор на нашата институција, соопштија од синдикатот на Македонската филхармонија.
Посочуваат оти имаат информации дека Имери не доставил комплетна документација.
Имаме информација дека Имери не доставил комплетна документација, иако во конкурсот јасно е назначено дека некомплетните и ненавремено доставени документи нема да се разгледуваат. Комисијата веќе им дала рок на кандитатите кои не доставиле уредна документација да ги достават потребните документи во рок од три дена. Со тоа се кршат условите пропишани во конкурсот, се со цел да се истера меѓупартискиот договор меѓу ВРЕДИ и ВМРО-ДМНЕ и да се назначи Мустафа Имери за директор на нашата институција, посочуваат во соопштението.
Ова доаѓа откако вицепремиерот и министер за животна средина Изет Меџити во интервју за 24 Вести посочи дека при поделбата на раководните функции во институциите, ВЛЕН ја добил Филхармонијата и дека директор ќе биде Мустафа Имери.