На денешната конститутивна седница во македонскиот парламент ќе се верификуваат мандатите на 123-цата македонски пратеници. Ова е осмиот по ред парламентеранен состав во независна Македонија. Пратениците на СДСМ и коалицијата нема да учествуваат на седницата. Тие одлучија да ги вратат мандатите, а претходнот не си ги подигнаа ниту уверенијата од Државната изборна комисија. Без нивните 34 освоени мандати и без еден пратеник на Руфи Османи денеска во парламентот ќе седнат 61 пратеник на ВМРО ДПМНЕ, 19 пратеници на ДУИ, 7 пратеници на ДПА и 1 пратеник на ГРОМ.
Но, според Законот парламентот денеска ќе се конституира и без присуството на пратениците на СДСМ, а нивните мандати ќе бидат верификувани во парламенотот. Потоа тие имаат можност да поднесуваат оставки во Собранието.
Но, копја ќе се кршат и на релација ВМРО ДПМНЕ – ДУИ. ДУИ веќе најави дека не остатапува од намерата Претседател на Собранието да биде Албанец, а истовремено не го признава претседателот Ѓорѓе Иванов и континуирано повикуваше на бојкот на претседателските избори бидејќи инсистираа на консензуален претседател. Вчера, пак, ВМРО ДПМНЕ испрати остра порака до ДУИ дека ако не го признаваат Иванов тогаш не може да стане збор „за било каква соработка помеѓу нив“. Тука е и ДПА чиј лидер постојано зборува дека токму тој ќе биде коалиционен партнер во Владата.
Денеска седницата ќе ја води најстариот пратеник во Собрането. Потоа почнуваат да течат роковите за формирање на Влада. Пред Собранието заклетва треба да положи и повторно избраниот претседател Ѓорѓе Иванов.