Јавното претпријатие „Дрисла“ ќе плати казна од 8.500 евра поради тоа што државните инспектори за заштита на животната средина констатирале дека имало надминување на штетните концетрации во воздухот при согорувањето на медицинскиот отпад.
Претпријатието доби обврска до средината на февруари да вгради соодветни филтри.
– Според законот казната се движи до 25 илјади евра. Прекршочната комисија донесе спогодбена одлука депонијата да се казни со 8.500 евра. Се постапи по Законот за амбинтален воздух. Јавното претпријатие треба во рок од 90 дена да постави филтри и да го реши проблемот, рече Мирослав Богдановски, директорот на Државниот инспекторат за животна средина и додаде дека медицински отпад може да согорува само осум часа во денот, не во три смени како што било претходно.
Палењето на медицинскиот отпад ќе се врши до средината на февруари само по три часа дневно, и тоа само кога има поволни метеоролошки услови.
– Немаме резервна варијанта за тој медицински отпад и може да настане многу поголем проблем во однос на складирање и постапување со него. Целиот медицински отпад од Македонија се носи во „Дрисла“ и може да настане голем проблем, рече Богдановски.
Директорот истакна дека инспекторатот спровел 15 вонредни инспекциски надзори во Скопје и во Тетово согласно Законот за квалитет на амбиенталниот воздух и дека постапка за спогодување е поведена само против „Дрисла“, а во изминатите три години немало ниту една санкција за ниту еден правен субјект