Министерката за правда Рената Дескоска денеска изјави дека се уште нема конечен став дали ќе има измени на законската регулатива за организирање и спроведување на референдумот, во контекст на договорот за решавање на спорот со името.
„Во моментов немаме донесен конечен став околу тоа дали ќе се оди со измена на Законот за референдум или не. Имаме предвид дека станува збор за закон кој е стар и не е усогласен со Изборниот законик“, изјави денеска министерката за правда Рената Дескоска.
Според неа, кога би се правеле измени тие би биле чисто технички. Суштински измени, според Дескоска, не се планирани.
„На пример во текстот на Законот за референдум пишува дека повикување на законот за Избирачки список, што не постои и е заменет со Изборен законик, понатаму пишува повикување на закон за избор на пратеници кој исто така не постои, сега е заменет со Изборен законик. Исто така, делот што се однесува на заштитата на правото на гласање се разликува од заштитата на Избирачкото право. Законот за референдум оперира со постапка со заштита пред Врховниот суд додека пак Изборниот законик реферира на постапка пред Управните судови“, рече министерката за правда.
Референдумското прашање ќе го дефинира Собранието, вели Дескоска, зависно кога би се одредил датум за референдумот.
Од Министерството за правда, вели таа, досега не се побарани активности во однос на референдумот.
Министерката за правда Дескоска денеска имаше обраќање на 98. Рос-Рот семинар во Собранието на Република Македонија на сесијата посветена на Зајакнување на владеењето на правото, реформа во администрацијата и правосудството, борба против корупцијата.
Таа зборуваше за претстојните реформи во правосудниот сектор, имајќи ги предвид забелешките на ЕУ.
„Реформите во областа на судството се веќе почнати. Донесена е Стратегија за реформи во правосудството. Веќе се направени дел од измените на законите, но исто така ни претстои нов турнус на измени кои треба да опфатат дел закони за судство – Законот за судови кој се носи со двотретинско мнозинство, Законот за јавно обвинителство, Законот за судски совет… Законските текстови кои беа донесени за Законот за судови и за Законот за судски совет се веќе пратени во Венецијанската комисија, чекаме од нив мислење за она што досега е изменето и дали доследно се имплементирани препораките кои претходно беа дадени, рече Дескоска.
Предвидени се и измени на Законот за јавно обвинителство кои што исто така е двотретински закон и бара поширок консензус за донесување и кој е дел од пакетот реформи.
Дескоска информираше и дека во Министерството за правда е формирана работна група која работи на измени на законска регулатива за спречување на корупција што ќе значи нов начин на формирање на Антикорупциската комисија.