Премногу е гласна тишината на жените функционерки од ДПМНЕ и од другите партии. Исто како што е очигледно дека одредени партии селективно реагираат на мизогиниот говор на Неделковски селективно.
Кристина Костова
Колку што се грди, примитивни, мизогини и одвратни зборовите на извршниот директор и играчите на „Вардар“, толку се и целосно очекувани и не претставуваат никакво изненадување.
За жал, во нашата култура долго време се негува и нормализира гнасен говор за жените, и тоа особено во десниот камп.
Затоа нема простор за изненадување и фрапирање, оти секојдневие станаа нивниот простаклук, вулгарност и говор на омраза, особено од дотичниот директор.
Вчера беше погодена позната музичка ѕвезда, денеска уште една политичарка, а во минатото еден куп политичарки и јавни личности, па дури и девојките кои протестираа и бараа правда за Кочани минатата година; премногу жени биле предмет на вербално малтретирање од страна на Миленко Неделковски. Тие вербални деликти остануваат неказнети, иако преку истите влијателниот директор ги подбуцнува и инспирира обожавателите кои ги дели со ДПМНЕ на насилнички јазик кој пречесто од социјалните мрежи се прелева во реалноста.
Миленко Неделковски не е некој нонејмер, некој неконсеквентен грев што се сили на социјалните мрежи. Не, тој е влијателен чинител секогаш кога е ДПМНЕ на власт. До толку што и Вишото обвинителство продолжува да го штити, дури и кога се заканува дека ќе закопа новинари под бетонска плоча.
Кога тој е гласен и дрско непоколеблив во неговата мизогинија им испраќа сигнал на одобрување на сите дека таквото однесување и таквиот говор се прифатливи. А, не се. Или, барем, не треба да бидат.
Потребна е итна регулација особено на говорот на социјални мрежи, кои сиве овие години остануваат „ничија земја“ и плодно тло за вербализирање на најгнасните мисли и нивно нормализирање. Оти говорот на омраза, насилство и женомразаштво раѓа омраза, насилство и женомразаштво.
Не е доволно да се остане само на осуда за Неделковски и навивачите, но и тоа е почеток.
Сепак, премногу е гласна тишината на жените функционерки од ДПМНЕ и од другите партии.
Исто како што е очигледно дека одредени партии селективно реагираат на мизогиниот говор на Неделковски.
Осудата за женомразачкиот говор и сеопфатно однесување на Неделковски треба да е конзистентен став – и кога тој ја навредува Богданка или Кристина, но и кога ја навредува Весна, и Каролина, и девојките кои протестираа за правда за Кочани, и која било жена …
Не за селективна осуда, во зависност од тоа дали ни се допаѓа оштетената или не, туку за принципиелен став дека мизогинијата е апсолутно неприфатлива во секоја општествена пора!
Од Фејсбук ѕидот на авторката