„Една од точките која ги содржи португалскиот предлог е историчари од држави членки на ЕУ да се вклучат во работата на Комисијата за историја“, откри претседателот на Република Северна Македонија, Стево Пендаровски кој доцна попладнево во Рим даде изјава за македонските медиуми.
„Радев вели ние сега ќе бараме гаранции од ЕУ дали ќе се имплеменира Договорот за добрососедство. Ние немаме ништо против трета страна, ЕУ или ЕК да каже дали договорот оди со добро темпо. Не ни пречи да дојде трет човек од страна и да каже: ни ти, ни ти, ова е вистината. Ние во декември доставувавме акциони планови, тие ни одговараа, па не се најдовме. Во португалскиот нон пејпер тие предлагаат дека треба да постои патоказ и да биде нагледуван во Советот за асоцијалција и стабилизација, а не од Еворпската комисија. Во португалскиот предлог постои еден друг детал, вели вака: има европски држава кои би биле заинтереисани да контрибуираат во историската комисија. И во тој дел немаме проблем. Но, за да се приклучат такви луѓе на Комисијата тоа мора да биде со взаемна согласност на двете страни“, рече Пендаровски.
Ниту Скопје ниту Софија не го отфрлија португалскиот нон пејпер, вели Пендаровски, што според него преставувало добра работа. Тој додаде дека двете земји кон овој документ пристапиле како кон еден сет на идеи кои понатаму треба да се развиваат.
Сепак, според шефот на државата, разговорите кон т.н. преговарачка рамка и понатаму ќе се водат во ЕУ меѓу земјите членки.