СОЊА КРАМАРСКА
Шефот на парламентот, највисоката институција на државата, Талат Џафери, денес нервозно ќе извика – и моето дете треба да има права како и сите други луѓе, осврнувајќи се на бурните реакции во јавноста откако „детето“ Барлет, завршен слушател на Академијата за судии и обвинители, стана потенцијален извршител на една од најважните функции во државата – судска и обвинителска. Прашање на денови е кога Барлет ќе ја облече судиската или обвинителската тога и ќе почне со правораздавање – дисциплината по која Македонија не само што не се прослави, туку стигна до дното со 5-6 отсто доверба кај јавноста.
Верува ли некој дека младиот судија или обвинител Барлет, син на претседателот на парламентот и истакнат член на ДУИ, ќе биде објективен и непристрасен во вршењето на функцијата? Јас не!
Еве зошто: Таткото и синот Џафери си дозволија „детето“ со уште нестекнато уверение за положен правосуден испит да се пријави и да биде избран во Академијата за судии и обвинители. Верува ли некој дека тој таму бил избран врз основа на објективни критериуми, покажано знаење и подготвеност да биде обучен за најважната професија во Македонија и дека тој не бил поттурнат од тато да ја помине строгата селекција? Јас не!
Зошто? Затоа што на Академијата редовно се пријавуваат неколкукратно повеќе кандидати отколку што треба да бидат примени.
И затоа што многумина од нив и по неколку пати „паѓаат“ на тестовите за да има место за татините и мамини синови и ќерки. И тие имаат права исто како и синот на претседателот на парламентот Талат Џафери, ама ете не им се посреќува да си ги остварат. Иако на Академијата конкурираат со чисти документи а не со извалканиот потпис од Министерството за правда каде министерот сопартиец на таткото Џафери решил да биде закон над законите и да му издаде „аусвајз“ на синот Џафери. Од тој момент синот на Талат Џафери не е со помали права отколку другите, туку со поголеми.
Се сомнева ли некој дека сите тие што „паднале“ на тестот за прием во Академијата паднале поради незнаење? Јас се сомневам! Паднале затоа што не биле детето на Џафери или на некој друг родител на среќниците кои ќе бидат новата генерација правораздавачи.
Шефот на парламентот може да биде среќен и исполнет. Правото на неговиот син не е нарушено, напротив реализирано е погазувајќи ги правата на стотици други кандидати и во едни крајно компромитирачки околности. Џафери може мирно да спие додека кандидатите кои „не го поминаа“ тестот будни ќе сонуваат за една поправедна држава во кои и тие ќе можат да имаат права како Барлет Џафери, синот на Талат Џафери.