Само 100 деца имаат достапност до хормонска терапија и оваа одлука на надлежните не е променета во последните 15 години. Неофицијално, терапија чекаат најмалку 60 деца. Лекарите чекаат некое дете да биде исклучено од терапија за да може да ја прима друго. Ова е дискиминација кон децата на кои им се одзема правото на лекување, велат во Здружението „Раст“.
“Поради ненавремено дијагностицирање и времето поминато на листата за чекање, некои деца не го примаат хормонот за раст, и покрај правото на лекување ,тие се дискриминираат. Овие деца ако не се лекуваат имаат зголемена појава на срцеви заболувања, депресии, зголемена тежина, мозочни удари.“, изјави Александар Петровски, претседател на Здружението Раст.
Директорот на ФЗОМ, Ден Дончев нема конкретни мерки, но ги потсети клиниките да одвојат дел од својот буџет за терапија.
„Вистинското место за лобирање не е само фондот, туку и соодветните клиники. Да се најде начин да се одвои поголем дел од сретствата за потребите на децата во сегментот на наменски набавки на одредени лекови и хормони, “ изјави Ден Дончев.
На Клиниката за детски болести велат дека ги имаат сите типови на хормон за раст.
„ Има потешкотии кои се обидуваме заеднички да ги решиме. Индикациите се поставени на одделот и во државата ги имаме сите можни типови на хормони за раст, прифатени насекаде.“ изјави д-р Елена Шукарова Ангеловска.
Но, терапијата не е достапна за сите деца кои имаат потреба од неа. Доктор Аспазија Софијанова нагласи дека борбата трае со години и е задничка со здружението.
„Се што можеме да направиме е да ги препознаеме децата кои имаат проблем“, изјави доктор Аспазија Софијанова од Клиниката за детски болести.
Превенцијата и раното откривање се многу важни. Училиштето Владо Тасевски ќе биде првото каде што ќе се работи на подигнување на свеста кај децата, а превентивни тимови ќе ги прегледуваат првачињата.