На сред Медицински центар во Кавадарци локалната власт гради детска градинка. Објектот кој е фаза на изградба се наоѓа на неколку метри до лабораторијата каде што им се проверува крв на болните, до градинката е лоцирана и лабораторијата за микробиологија, зад него е детскиот диспанзер и вакцинациите, а спроти градинката се наоѓа амбулантата за кожни и венерични болести. Тука е и Итната медицинска помош и амбулантите за возрасни, а веднаш до нив стоматолошките ординации.
„Градинката се гради на местото на биохемиската лабораторија која ја преселија на пет метри до градинката. Како е можно некој да одлучи деца се сместат на сред медицински центар каде што доаѓаат болни и итни случаи, навистина не е јасно. Се прашуваме како тоа ќе влијае на нивната психофизички развој. Сите сме зачудени и фрапирани, а родтелите веројатно не се ни свесни каде каде ќе им бидат сместени децата“, велат за НОВА дел од медицинскиот персонал кои ги затекнавме за време на нивната смена.
Во Кавадарци има неколку објекти кои се клонови на детската градинка кои имаат капацитет за 550 деца, а во нив се згрижени двојно повеќе, односно 1060 деца. Поради неопходната потреба од нов објект во ноември минатата година Советот на општината едногласно ја изгласал одлуката за изградба на детска градинка. Тоа за НОВА го потврдија и од кабинетот на градоначалникот Алексадар Панов.
Од писмениот одговор од Општината се вели дека при изборот на локацијата се почитувани важечките нормативи согласно ДУП на град Кавадарци, Законот за просторно и урбанистичко планирање, Законот за градење и Правилникот за стандарди и нормативи за урбанистичко планирање член 28, став 3, алинеа 3, која се однесува на Јавни институции во делот В2 каде што спаѓаат објекти од здравство, социјална заштита и детски градинки со 40% компактибилност. (Службен Весник на Р. Македонија бр.217 од 2015 година).
„Врз основа на ова Општината има побарано и добиено позитивни стручни мислења од сите надлежни институции за издавање на Одобрение за реконструкција, адаптација со пренамена на објект од здравствена заштита во детска градинка. Врз основа на кои пристапи кон реализација на проектот Детска градинка“, се вели во одговорот на општина Кавадарци.
Од друга страна дел од советниците тврдат дека кога предлогот бил ставен на гласање не било назначено каде ќе биде лоцирана градинката. На почетокот на оваа година градоначалникот добил согласност да за уривање на објектот на старата Биохемиската лабораторија и на тоа место да се изгради детска градинката, тврди за НОВА, Сашко Петров советник од СДСМ во Советот на општина Кавадарци.
„Точно е дека не беше утврдена локацијата кога се донесе одлуката. Ние разгледувавме неколку објекти каде што може да биде сместена градинката. Местото каде што сега се гради не е соодветно за децата. Што ќе се случи доколку некое од децата излезе од дворот и дојде во допир со некој медикамент или се боцне со шприц. Како на нивната психичка состојба ќе влијае звукот на сирената од возилата на брзата помош“, вели за НОВА Петров.
Ова не е единствениот објект кој се гради во дворот на Медицинскиот центар во Кавадарци. На местото на детската болница веќе е преселено музичкото училиште, а зад него, во непосредна близина на Итната медицинска помош се гради концертна сала. Граѓаните велат дека пред да почне изградбата и на концертната сала биле исечени столетни дрвја кои го карактеризираа просторот, им држеа ладовина на пациентите и вработените и беа гордост на кавадарчани.
