Целосно е реконструиран Одделот за онкологија на Унивезитетската клиника за детски болести. Со комплетното реновирање, извршено со донација од 260 илјади евра од компанијата „Макстил“, во одделот се поставени нови системи за вентилација и за технички гасови, реновирани се сите болнички соби и просториите за медицинскиот персонал, обновена е електричната инсталација, како и дел од водоводната и канализациската мрежа, а поставен е и нов медицински под на површина од 400 квадратни метри.
„Детската клиника доби реновиран оддел за онкологија, кој е еден и единствен на ниво на регионот и ќе ги згрижува сите деца болни од малигни болести, дали тоа ќе биде на крв или солидните органи, важно комфорот, условите и високиот квалитет на здравствена заштита што ќе го добијат, заедно со родителите и целиот персонал, ќе го удостои здравството и ќе го подигне на многу повисок чекор. Отвораме една нова страница во педијатријата и во здравството, затоа што третманите што ќе ги добиваат децата веќе ќе значат вон од третманот што го добивале досега и трансплантација за која во иднина ќе слушнете и многу набрзо ќе биде извршена и во нашата држава“ – истакна директорката на Универзитетската клиника за детски болести Аспазија Софијанова.
Никој, посочи таа, не посакува да има дете болно од канцер, меѓутоа ако веќе тоа се случи и емоционална и психолошка и комплетна медицинска поддршка ќе ја добијат тука на Клиниката за детски болести во мини болницата, која ја овозможија „Макстил“ и нејзините партнери, да уживаме денеска во задоволството дека и ние, рамо до рамо, ќе се носиме со здравствениот систем на целиот свет
Претседателот на Одборот на директори на „Макстил“, Димитар Цветковски рече дека соработката со Детската клиника трае подолго време. „Пред четири години дониравме специјален ехо-апарат, потоа следеше целосно реновирање на одделот за неонатологија и сега, по барање и во договор со клиниката, го предаваме во употреба и онколошкиот оддел“, потенцираше Цветковски.
