Девет лица се уапсени, а по 27 МВР се уште трага по денешната антитерористичка акција против осомничени структури на исламската држава во Македонија.
Осомничените се товарат за организирање и врбување на поединци да заминат во паравоените формации надвор од територијата на Македонија.
Извршен е претрес во 28 објекти, од кои 21 се во Скопје, четири во Гостивар и по еден во Тетово, Куманово и Струга. Претресувани се домови, помошни простории на џамијата Тутунсуз во Скопје, како и невладините „Искра на милоста“ и „Исламска младина на Сарај“.
Собирањето на доказите започнало во септември 2014 и траелo до јули годинава, по наредба на Обвинителството.
Министерот Митко Чавков пред малку изјави дека е упасен еден имам од Скопје кој се смета за еден од идеолозите за регрутирање и организирање на мрежата.
Чавков вели дека за акцијата претходно е известена и Исламската верска заедница во Македонија (ИВЗ), која неколку пати досега апелираше да се интервенира во џамии кои не се под нивна контрола.
Во акцијата која се одвивала во 3 ипол часот утринава одземени се десетици десктоп компјутери, лаптопи, мобилни, сим картички, потврди за трансфер на пари, како и еден пиштол.
Осомничените се на возраст од 19 до 45 години, а МВР има докази дека дел од нив се поранешни учесници во боиштата.
Надлежните немаат информација дали постојат Центри за обука за тероризам низ земјава, но се сигурни дека осомничените делувале за исламскиот фундаментализам.
Според информациите на МВР досега околу 130 македонски државјани учествувале во воените жаришта, а дел од нив се сè уште таму.