По дописот што до претседателот на Собранието Талат Џафери, го достави пратеникот Антонио Милошоски со кое бара да му се обезбедат средства за кампања во рефрендумот, од Собранието објаснуваат дека парите што се издвоени за кампања нема да се делат на секој пратеник одделно, туку Собранието ќе закупи медиумски простор пропорционално врз основа на бројот на вкупниот број на пратеници кои ќе се изјаснат „за“ или „против“.
„Водењето на јавна кампања не подразбира дека Собранието, како овластен предлагач, ќе дели средства поединечно на секој од 120-те пратеници за нивно водење кампања за референдумот на државно ниво. Затоа претседателот Џафери, во текот на вчерашниот ден, упати известување до пратеничките групи и до пратениците кои не се организирани во пратенички групи, во рок од три дена да го известат дали ќе учествуваат во јавната кампања и каков ќе биде нивниот став по референдумското прашање „за“ или „ против“. Врз основа на добиените податоци, пропорционално, Собранието ќе закупи медиумски простор за учество на дебатни емисии, пишани медиуми и интернет портали“ објансуваат од Собранието.
Пратеникот Антонијо Милошоски од ВМРО-ДПМНЕ денеска со допис го известил Претседателот на Собранието Џафери дека ќе учествува во јавната пропаганда на претстојниот референдум со бојкотирачки став.
– Јас, Антонио Милошоски пратеник на ВМРО-ДПМНЕ во координација со координаторот на Пратеничката група на ВМРО-ДПМНЕ ве известувам дека ќе земам учество во јавната пропаганда на претстојниот референдум со бојкотирачки став, бидејќи сум против референдумското прашање, а бојкотот е загарантирана демократска опција за секој граѓанин и е во согласност со демократските традиции на РМ од 2004 година и Кодексот на Венецијанската комисија при Советот на Европа од 2007 година, пишува Милошоски во писмото што го испратил до Џафери.
Пратеникот Милошоски, притоа бара од македонското Собрание да му обезбеди средства предвидени за таа намена.
Партијата на Милошоски, ВМРО ДПМНЕ се уште не се изјаснила дали ќе повика на бојкот. Џафери очекува во понеделник сите пратеници да го кажат својот став за да може Собранието да закупи медиумски простор за реклами.
Владата одлучи на сметка на Собранието да префрли 80 милиони денари или 1,3 милиони евра. Кампањата ќе ја води Собранието како предлагач на референдумот.