Претседателот на Собранието на Република Македонија Талат Џафери вечерва на граѓаните и институциите им честита за спроведеното гласање, без ниту еден инцидент и со мирен и демократски процес на гласање.
– Со ова граѓаните докажаа дека припаѓаат на ниво на политичка култура на демократски развиените земји, но тоа што е најважно дека припаѓаат на големото европско семејство, рече Џафери.
Во оваа прилика Џафери им честита на сите домашни институции за мирниот изборен процес, без ниту една пријавена сериозна неправилност.
– Граѓаните денеска ги поставија темелите на идната Македонија. Гласот на суверенот е тој што одлучува за иднината на оваа земја. Се надевам и се надеваме дека одлуката на суверенот е во насока на една подобра иднина за сите граѓани на Македонија, рече Џафери.
Таа одлука, како што посочи тој, ќе биде основа за идните процеси што не очекуваат во следниот период во институциите на системот.
Тој потврди дека не гласал на референдумот затоа што не фигурирал на избирачкиот список.
Одговарајќи на новинарско прашање дали се можни предвремени избори, со оглед дека премиерот Заев најави таква можност доколку нема парламентарно мнозинство за изгласување на уставните измени, претседателот на Собранието на Република Македонија рече дека Собранието ќе прави напори да обезбеди консензус по ова прашање бидејќи, како што рече не се работи за теснопартиски интереси, туку интересот на државата и граѓаните.
– Во однос на можноста за предвремени парламентарни избори тоа е работа на парламентарните политички партии кои доколу обезбедат мнозинство во соодветна процедура која е пропишана во Деловникот и другите закони ќе може да се спроведат, рече Џафери. Тој не сакаше да коментира за тоа дали излезноста не е согласно нивните очекувања и кусо рече оти за бројките ќе зборува кога резултатите ќе бидат конечни.