Претседателот на Собранието Талат Џафери не одговори кога точно ќе биде закажана седницата на Комисијата за избори и именувања, на која пратениците треба да предложат имиња за четворица нови уставни судии.

На новинарско прашање, дали има најава кога ќе биде закажана седницата, Џафери само кусо одговори оти најава не може да има бидејќи за термините одлучувале претседателите на Комисиите.

Работата на Комисијата за избори и именувања долго време беше блокирана. Последниот состанок на ова работно тело се одржал во јули со една точка на дневен ред и тоа токму изборот на нови судии за Уставен. Поради несогласувања, тогаш пратениците ја прекинаа дискусијата, а набрзо потоа Комисијата прекина со работа поради распишувањето на локалните избори.

Дополнително, работата на ова тело се отежна и поради преструктурирање на владејачкото мнозинство во Парламентот, откако партијата БЕСА замина во опозиција.

Проблемот поради кој се закочи работата на Комисијата за избори и именувања, а голем број јавни функции останаа празни, вклучително и оние во Уставниот суд, беше нерамномерната распределба на составот на Комисијата чиј баланс се наруши поради пратеникот на БЕСА, Фадил Зендели.

Собранискиот спикер Џафери уште во февруари го повика Зендели да ја напушти Комисијата за избори и именувања, порачувајќи му дека како пратеник на опозицијата не припаѓа во ова тело. Отакако Зендели не си поднесе оставка, тој на 3 март беше разрешен од учеството во ова работно тело. На негово место беше избран пратеникот на СДСМ, Дарко Каевски.

На истата седница Комисијата доби и претседател, па сега комплетирана се очекува да почне со работа.

Инаку, Уставниот суд повеќе од девет месеци работи во отежнати услови и со преполовен капацитет, откако прво во јуни им истече мандатот на тројца судии, а на уште еден мандатот му истече во јануари годинава.

На денешниот брифинг со новинарите, претседателот на Законодавниот дом,  Џафери ги коментираше и предлог измените на Изборниот законик, за кои вели оти сметал дека треба да се донесат со консензус. Прашан дали ќе се прифати заклучокот донесен на Комисијата за политички систем, за организирање на јавна расправа по овој предлог, Џафери рече дека заклучокот прво мора да помине низ пленарна седница, а пратениците со мнозинство гласови ќе одлучат дали ќе има јавна расправа за измените на Изборниот законик.

„Ако предлог заклучокот од Комисијата биде изгласан од страна на Собранието тогаш може да се отвори јавна дискусија. Работното тело кое ќе ја организира јавната дискусија ќе се грижи за тоа предлог законот да се објави за да им биде достапен на граѓаните и на институциите, здруженијата на граѓаните и на политичките партии. Да обезбеди собирање на предлозите што биле изнесени на јавната дискусија и да подготви извештај за предлозите од јавната дускусија“, рече Џафери на денешниот брифинг со новинарите и додаде дека тоа матично тело веројатно би било Комисијата за политички систем.

Инаку, предлогот на закон за изменување и дополнување на Изборниот законик, при што државата би била една изборна единица вчера помина на собраниската Комисија за политички систем и односи меѓу заедниците.

Предлогот за една изборна единица беше изгласан со 11 гласа за, по што треба да следи и отворена јавна расправа за промена на овој модел.

(Б.Божиновска)