Претставници на џамијата во Злокуќани денеска не се појавиле на закажаниот состанок со инспекциската служба на општина Карпош кој бил договорен за во 9.30 часот. Во саботата (8 јануари 2022 година) инспекциска служба на Општина Карпош излегла на терен но во моментот кога е извршена контролата не се вршени градежни дејствија, стои во соопштението.
– Инспекторатот одреди 15 дена рок за доброволно отстранување на нелегалниот објект и ги повика одговорните лица на средба во општината денеска во 9.30 часот, но истите до сега не се дојдени. Во случај да не биде доброволно отстранет објектот во предвидениот рок, случајот ќе биде пријавен и во државниот инспекторат за градежништво и урбанизам, се наведува во соопштението од општинското одделение за контакт со јавноста на Карпош.
Џамијата била во сопственост на ИВЗ, тврдат верниците
Во меѓувреме реакција стигна и од џамискиот одбор, од каде велат дошле на средба во општина Карпош и им го доставиле имотниот лист од нивниот објект, со што негираат дека џамијата била дивоградба а тврдат била во сопственост на ИВЗ. Демантираат дека биле вехабии кои практикувале радикален ислам.
– Нашите религиозни практики се во линија со практиките и обредите на ИВЗ, се вели во дописот до НоваТВ.
-Генерално е познато дека припаѓаме под “Ханефиски Месхеп”, за кој имаме официјална дозвола и одобрение од страна на муфтиството на ИВЗ-Скопје издадена на 06.06.2016 врз основа на член 32 од уставот на Муфтиството на ИВЗ-Скопје. Официјален документ издаден од страна на Исламска Верска Заедница врз основа на член 32 од уставот на ИВЗ во СРМ, Муфтиство на ИВЗ-Скопје, со кој што се одобрува и согласува дека џематот од н. Злокуќани во општина Карпош, можат да ги извршуваат верските обреди т.е. клањање на намази и други верски дејствија пропишани со исламските прописи, велат во дописот до НоваТВ.