Весниците на германски јазик во критички тон известуваат за првиот круг од претседателските избори во Македонија. Посебно се на удар медиумската (не-)слобода и избирачкиот список.
Како што пренесува Дојче Веле на македонски јазик германски „Штутгартер цајтунг“ оценува: „Се чини дека на македонските досетливи властодршци им успеа операцијата ’реизбор‘. Како шефот на државата Ѓорге Иванов, и премиерот Никола Груевски едри кон сигурна победа на парламентарните избори. Но, националпопулистичките постојани победници ја водат својата земја сѐ повеќе во офсајд.
Со национална патетика, спорни престижни проекти и исклучување на медиумите кои се критички спрема владата, Груевски се здоби со сомнителниот глас на авторитарен властољубец. Но, билансот на неговите успеси е скромен. Згора на сето зло, властодршците натамошно ги оптоварија не само затегнатите односи со албанското малцинство, туку и со Атина. Некакво приближување кон ЕУ се чини подалечно од кога било досега“.
Австрискиот весник „Ди пресе“ под наслов: „Македонија: каде се бројат и мртвите души“, констатира дека „изборната увертира им успеа на македонските властодршци“ и оценува:
„Победникот на изборите Ѓорге Иванов се потпира врз спорен избирачки список. Опозицијата и префрла на владата дури и за ’систематска кражба на гласови‘. (…) Од 2006 година ВМРО веќе не загуби ниедни избори и во меѓувреме како сака ги контролира управата, правосудството и медиумите. Армијата од набљудувачи одвај да можеше да забележи неправилности. Но, кога ќе се отворат избирачките места, работата на манипулаторите на изборите на Балканот е веќе одамна завршена.
И во Македонија се поделени мислењата во однос на сомнителниот избирачки список. Се чини дека во мултиетничката земја се бројат и мртвите души. Списокот со речиси 1,8 милиони имиња опфаќа околу 90 проценти од населението како избирачи, збогатен и со починати и нови граѓани. (…)
На прашање од ОБСЕ, како е можно 30, 50 или дури и 70 нови избирачи да се пријавени во ист стан, властите не оставаат никаков сомнеж: истрагата што ја побара ОБСЕ никогаш не беше поведена. ОБСЕ констатира дека во Македонија нема јасна граница меѓу државата и партијата што е на власт“, пренесува Дојче Веле на македонски јазик, дел од пишувањето не „Ди пресе“ од Виена.