Советничката во ДИК, Љупка Гугучевска денеска во изјава за медиумите, ниту демантираше ниту ја потврди информацијата дека речиси 500.000 гласачи излегле како спорни од вкрстената проверка на Државната изборна комисија. Таа бројките во медиумите ги квалификуваше како шпекулации и побара да се сочека официјалниот извештај на ДИК.
Членовите на Државната изборна комисија на вчерашната седница не го усвоија извештајот и најави дополнителни тестови за проверка по што ќе следи јавна седница.
Дополнителните тестови се очекува да завршат во најскор можен период, а како што рече Гугучевска тоа е можно да се направи и во текот на утрешниот ден.
Од извештајот од вкрстената проверка зависи и кога ќе започне теренската проверка на податоците, при што ќе се проверуваат и нерегуларностите кои граѓаните ги пријавуваа во ДИК откако беше објавена електронската верзија на Избирачкиот список.
Владејачката партија ВМРО-ДПМНЕ веднаш ја отфрли бројката од речиси 500.000 спорни гласачи, потенцирајќи дека се работи за хајка на СДСМ и како што тие велат, медиумите платени од Сорос.
– Како што се зголемува стравот и паниката во СДСМ, така се зголемува и бројот на граѓани кои се спорни за СДСМ и нема да не зачуди доколку во наредните недели тој број порасне на 2 милиони, се вели меѓу другото во реакцијата на ВМРО-ДПМНЕ.
Како што објави денес НОВА, над 495.000 гласачи произлегле како спорни при вкрстената проверка и за нив е потребен дополнителен тест.
Над 190.000 илјади се евидентирани како фиктивни гласачи, кои ги има во базата на податоци во МВР, но не се појавуваат во базите на останатите институции.