ДИК го усвои Роковникот за предизборниот период, но без членовите на СДСМ, бидејќи Виолета Дума и Игор Милев не се појавија на денешната седница, откако ја напуштија вчерашната.
Претседателот Александар Чичаковски кој вчера заедно со Дума и Милев ја напушти седницата рече дека на седницата е само за нејзино техничко одржување, но не и дека се согласува дека Избирачкиот список е чист за одржување на изборите.
Избирачкиот список јавно ќе биде објавен на 25 април, додека партиите кандидатските листи ќе треба да ги заклучат на 11 мај за веќе од 16. да започне изборната кампања. Избирачки список треба да биде готов на 19 мај.
ДИК побара Министерството за информатичко општество да достави податоци за административните работници кои ќе бидат избрани во општинските комисии, а од МНР побара список на персонал кои ќе го спроведат изборниот процес во дијаспората.
Од МВР побараа да достават материјали за сомнителни гласачи, додека пак од МВР велат дека нема доволно време до 5 јуни да се проверат сите податоци кои од нив ги побарала дик и велат дека има огромна разлика во некои бројки, како на пример дека од 71 илјади сомнителни гласачи, 18 илјади никогаш од Министерството не побарале издавање на лични документи.
Досега над 300.000 граѓани беа предмет на теренска и административна проверка, а ДИК дополнителна побара проверка на 30. 000 граѓани.
Со сигурност од Избирачкиот список се бришат само 1.135 лица кои се починати.